Da i Bah Staising Kharbteng
Ka jingpynmih ia ki mar rep ban pyndap bam ia ki nongshong shnong ka long ka phang kaba kongsan haduh katta katta ban sngewthuh bad pylleit jingmut na bynta ka jingdonkam u khun bynriew ban im.
Haba ngi phai sha kane ka bynta ngi donkam ban sngewthuh ia ka jingtyllun ka por ba ngim dei ban shu shaniah tang ha kiwei ha kaba iadei bad ka jingpynmih ia ki mar rep.
Ka jingkylla jong ka suiñbneng ka dei kawei ka mat ba ngin sngewthuh ba ka ktah ia ka jingpynmih ia ki mar rep namar ka jingkiew jong ka jingshit ha kaba ki jing-thung jingtep ki shah ktah ha ka jingheh jingsan. Nalor kane ka jingshah ktah namar ka suiñbneng, kawei pat ka mat ka dei ka jingkiew sted ha ka jingbun briew. Kine ki dei ki jingeh kiba lah ban wanrah ia ka jingkyrduh ne duna bam ha ki sngi bad por ban wan lada ngim iohi jngai.
Ban pynkhreh ia kine ki jingma kiba lah ban mih na kine jingeh ka long kaba donkam ba ngin kyndit bynriew ba ngin shim ia ka jingkitkhlieh ba ngi dei ban pynkhlain ia ka kam rep ban pynmih bam na la ki shnong bapher bapher ka Bri u Hynñiewtrep bad ka jylla baroh kawei.
Ka jingpynkhlaiñ ia ka kam rep kan iarap ban pyndap bam ia ngi kum ka jaidbynriew lada don ka jingkyrduh bam ne duna ka jingmih ki mar rep ha ki por ban wan na kiwei ki jylla kiba ju pynmih ia ki mar rep ban pyndap bam ia ki nongshong shnong ka Ri India baroh kawei bad kan long ruh ka lad ia ki khun samla kiba lah nang lah stad ban phai sha ka kam rep kum ka lad kamai kajih da kaba pyndonkam ia ka jingstad katkum ka juk saian kaba mynta ha ka kam rep kaba lah ban pynmih bun ki mar rep. Kyrmen ba ngin iohi jngai bad sngewthuh ia kane ka jingpashat jingmut na bynta ka bha ka miat jong ngi kum ki nongshong shnong ka jylla.
Hooid ki don ki jingeh ba ki nongrep ki mad na ka por sha ka por ha bun ki bynta kiba lah ban pynduh jingkyrmen ia ki.Kyrmen ia kita ki jingeh baroh ba ki mad yn lah ban weng da ka jingshimkhia ki nongialam jong ngi bad kumjuh da ka jingiaid beit iaid ryntih ka iew ka hat ne ka die ka thied khnang ba kan ai mynsiem ia ki nong-rep bad khun samla jong ngi kiba lah nang lah stad ban phai sha ka kam rep kum ka kam kamai ja kpoh.
