Khartoum, Iaïong:
Katkum ki khubor la ong ba ka jingphah sangeh iasiat jong ka United States ia ka Sudan, ka la wanrah ia ka jing jai-jai ba shipor ha katei ka ri hadien ka jingiasiat kaba la neh kumba 10 sngi lynter bad kaba la shim ruh ia ka jingim jong ki spah ngut bad da ki hajar ngut ruh kiba la mynsaw ha katei ka thma.
Kumta ruh ki ri bapher ki la iohlad ban leit lum bad leit shaw ia ki paidbah jongki, kiba don hapoh jong katei ka ri bad kiba la sahkut noh naduh ba jia ka jingiakhun hapdeng ki 2 kynhun shipai jong katei ka ri.
Wat la katta, la ong ba la ioh jingtip ba ka jingiakhun ka la sdang biang bad ym tang ki jingiasiat kiba malu- mala hynrei ka jingiakhun jong kitei ki 2 kynhun shipai ka Sudan ka la long naduh ryngkew bad na suiñ ruh kumjuh ha kaba ki liengsuiñ thma ki la ther bom sha ki jaka treikam bad sha ki shnong ba shong ki riew paidbah ba kin ioh ban knieh ia ka bor synshar kat uba lah bad uba kham khlaiñ bor.
Ki heh ka US ki la iathuh ba ha ka jingshisha, ki la ioh ban ïakren bad kitei ki heh nongialam jong kitei ki ar kynhun shipai kiba kynthup ia u Abdel Fattah al-Burhan bad u Mohamed Hamdan Daglo bad kiba la poi shaduh u pud ka jingiapyni bor mar pyrshah namar ka jingkwah ban ioh knieh ia ka bor synshar.
Nalor kata, ka US ka la pyntip ba watla katei ka jingiakhun thma hapdeng kitei ki ar kynhun shipai, ka la pynjot ia ki shnong- ki thaw, ka la pynjynjar bad shim ruh ia ka jingim jong shibun ki riew paidbah, hynrei kaba sngewsih ka long ba ym i-kop ba kitei ki heh kin poi noh sha ka jingiasuk namar ka jingkhluid na baroh arliang ka dang jur bha bad kumta ruh kitei ki heh ki la shu iai shah shipor tang ban ailad ia kiwei pat ki ri ba kin leit shaw noh ia ki paidbah jongki kiba don ha Sudan.
Kumta la ong ruh ba ka la don ka jingma kaba khraw hadien ba ka World Health Organization (WHO) ka la maham ia ka Sudan hadien ba kawei na kitei ki kynhun ka la ioh knieh ia ka jaka pule bniah ‘Laboratory’ kaba don ha Khartoum bad kaba ju buh ia ki nongmuna jong ki jingpang cholera, measles, polio bad kiwei de ki jait khñiang jingpang naka bynta ban ioh peit thuh bad pule bniah hapoh jong katei ka jaka wad bniah.
Kumta, la ong ba hadien ba ka jingiasiat kaba jur ka la sdang ban jai-jai, da ki hajar bad ki phew hajar ki nongwei lane ki paidbah ba nabar jong ka Sudan, ki la pynkloi ban leit phet noh sha ki ri bapher ba ki shong ki sah bad kiba ki dei trai khnang ban pyllait im ialade na katei ka thma.
La ong ba katei ka jingiakhun bad jing ia-pyni bor ba 10 sngi lynter hapdeng jong kitei ki ar kynhun shipai, ka la pynjot bad pyn-um ia ka shnong ka thaw baroh kawei bad da ki spah ngut ki la khlad bad la shu iohi ia ka metïap jongki ha ki lynti- ki synkien bad ha ki surok. Nalor kata, da ki hajar ngut ki paidbah nongshong shnong ki la mynsaw bad shah ktah jur na katei ka jingiakhun thma jong kitei ki ar kynhun.
