Shillong, Ïaïong 26:
U Symbud Myntri Rang-bah ka jylla, u Bah Prestone Tynsong, uba bat ruh kum u National Vice-President ka National People’s Party (NPP), ha ka Sngi Balang u la ong ba ka NPP kam kwah shuh ïa ki seng saiñpyrthei kum ka UDP, BJP, PDF, HSPDP ba kin shu ïatreilang ha ka sorkar, hynrei la tyrwa ba kin wan pynïasoh noh syndon bad ka NPP.
Ha kajuh ka por, u Bah Prestone u la kam ba ka jingdon jong ki MLA ka NPP ka lah ban kiew shaduh ka 34 ngut ha ki khyndiat sngi ban wan.
Haba ïakren bad ki katto katne ngut ki nongthoh khubor hadien ba la wai ka jingïalang ïalap ilekshon ïa u kyrtong ka NPP na Sohïong konstitwensi, u Bah Samlin Malngiang, ha Madan-bitaw, u Bah Prestone u la ong ba kan sa don ka jingkylla ha ka saiñpyrthei hapdeng 6 bad 8 tarik Jymmang, 2023, hynrei un sa pyntip kiei kita ki jingkylla ki ban sa urlong namar um kwah ban pyntip lypa mynta.
Haba pyrshang ban kylli la ki dei ki ar ngut ki MLA ka PDF ki ban rung noh sha ka seng NPP ne kiei kita ki jingkylla, u Bah Prestone u la ong biang ba ym dei tang ba khot ïa ki MLA ka PDF, hynrei ïa baroh ki seng saiñpyrthei kiba ïatreilang ha ka sorkar MDA 2.0 ba kin wan rung noh sha ka seng NPP.
“Ngim kwah shuh ïa kine ki seng saiñpyrthei naduh ka UDP, BJP, PDF, HSPDP ba kin shu ïatreilang ha ka sorkar, hynrei ngi la tyrwa ba kin wan pynïasoh pura noh sha ka seng NPP,” u la ong.
Katba dang buh jingkylli u Bah Prestone u la sdang ban pynpaw biang ba ki don ki MLA ki ban rung tangba ym lah ban tip la kin rung tang ma ki ne kin rung lang baroh kawei ka seng jong ki. U la ong ba ïa kane yn sa peit ha kitei ki tarik.
Haba kylli aïu kan jia ïa u Bah Kansing Lynshiang, u kyrtong ka NPP na Mawkynrew ha ka ilekshon ba la dep lada pdiang noh ïa u MLA ka PDF, u Bah Banteidor Lyngdoh, u Bah Prestone u la ong ym dei tang ha Mawkynrew konstitwensi, hynrei uno uno u MLA haba u la rung kata la hap ban burom shwa ïa u MLA ha kato ka konstitwensi. Ha kajuh ka por, u la ong ba um kwah ba kin leh kiar noh ïa ki nongtrei kiba la don lypa bad donkam ban ïatreilang ban pynkhlaiñ ïa ka seng.
Haba kylli kumno u sngew haba u Bah Banteidor u la dep kynnoh ïa ka seng NPP ba ka la tyrwa pisa haduh T. 5 klur ïa u ban ïakhun ïa ka ilekshon na ka seng NPP, u Bah Prestone u la ong kane ka dei tang ka nia ilekshon, namar bym don nia la shu shna la ka shna tang ban jop ilekshon.
Shuh shuh u Bah Prestone u la ong ba ka jingkiew ka jingdon ki MLA ka NPP kan poi ruh sha ka 34 ngut ha kitei ki tarik ba la kdew, hynrei um kwah ban pyntip lypa ïa kata ka jingkylla.
Watla u Bah Prestone um kwah ban pynpaw kyrteng ïa ki MLA bad ïa ki seng saiñpyrthei kiba wan pynïasoh sha ka NPP, hynrei ki khubor ki ïathuh ba ki ar ngut ki MLA ki dei na ka seng PDF kumba la mih khubor ha kine ki sngi kiba kynthup ïa u Bah Banteidor na Mawkynrew bad Bah Gavin Mylliem na Sohra.
