Shillong, Ïaïong 26:
Ka Meghalaya High Court ha ka Sngi Balang ka la pynpaw ba kam lah satia ban pdiang hadien ba ka surok kaba la maramot ha u bnai Rymphang mynta u snem, ka la sdang ban tor noh dang mynta.
Ïa kane, ka High Court ka la pynpaw haba bishar ïa ka mukotduma ba la ai da u A.H. Hazarika halor ka surok Agia-Medhipara-Phulbari-Tura (AMPT).
U Hazarika u la pynpaw ba ka jingmaramot ïa katei ka surok ka dang ïaid lait noh ha ka bynta kaba don 9 km. U la ong ba ïa kane ka bynta kaba naduh 32 km haduh 41 km la dep ban maramot ha u bnai Rymphang 2023, hynrei ka jingtor bad jingsniew jong ka surok ka la sdang ban paw naduh mynta.
“Lada ka long kumta, ka long shisha kaba pynkyndit. Ka long ruh ka bym lah ban pdiang ba ka surok kaba la maramot ha ka por bym slap ha u bnai Rymphang ka la sdang ban tor noh tang hadien ba la hap slap malu mala,” la ong ka High Court.
Na ka liang ka High Court ka la bthah ïa ka sorkar jylla ba kan peit halor katei ka jingpyni jong u Hazarika ha kaba ïadei bad ka bynta jong ka surok kaba don 9 km, bad ban ai da ka kaiphod sha ka ïingbishar ha ka 12 tarik Jymmang, 2023 kaba long ka sngi ba kan sa shong bishar biang halor katei ka mukotduma.
