Shillong, Ïaïong 26:
Ka Myntri ka tnat ka koit ka khiah, ka Kong Ampareen Lyngdoh ka la ong ki nurse ha Jylla ki la bun palat haduh ba ym lah ban ai kam ïa ki, bad hap ban thaw lad wat ba kin nang ïa kiwei ki jait ktien khnang ba kan long ruh ka lad ba kin ïoh kam ban leit trei sha kiwei ki Jylla ne ki ri, lada ki kloi ban leit trei.
Haba kren sha ki lad pathai khubor hadien ka jingïalang ban sngewthuh ïa ka jingdon ki nongtrei kiba ai jingshakri ha ki jaka ai jingsumar, ka Kong Ampareen ka la ong ba ki doktor ki duna, lada kheiñ katkum jingdon kiba la pule ban trei kum ki nurse, ka Jylla ka bun palat.
Ka Kong Ampareen ka la ong ba ka Jylla ka lah ban pdiang kumba 1500 ngut ei ei ki nurse, hynrei lada shim ïa ka jingdon jong ki nurse ha ka por ba ki thep kam, ka pyni ba ki la tam, bad ym lah ban ai kam lut ïa ki, namar ki don kumba 5000 ngut ei ei.
Kane ka Myntri ka la ong ba ka don ka jingai jingmut ba ka Sorkar kan ïaleh ban thaw ki lad kumno ban don ki kynhun kiba lah ban ai kam lang ïa kine ki nurse.
Ka la ong ruh ban plie lad ïa ki nurse, ka long ruh kaba donkam ba kin pule bad nang ïa kiwei pat ki jait ktien, Namar da kaba nang ïa ki jait ktien, kan long ruh ka lad ïa ki ban ïoh leit trei ha ki jaka ai jingsumar shabar ka Jylla ne sha kiwei ki ri kumjuh kiba donkam ïa ka jingai jingshakri ha ka koit ka khiah.
