Shillong, Ïaïong 26:
U MLA ka BJP na South Shillong konstitwensi, u Bah Sanbor Shullai u la ong ba ka BJP kum ka seng kam don jingtip ei ei halor ka jingkam u Bah A.L Hek, uba dei u Myntri Sorkar bad u MLA ka BJP, ba u la ïoh ban dih sha bad ki MLA ka TMC ha kaba u la ïakren bad ki halor ka phang ban ïalong kawei noh (merge) bad ka BJP.
Haba ïakren bad ki nongthoh khubor ha ka Sngi Balang, u Bah Sanbor u la ong ba kat kata ka khubor kaba heh bad sngewtynnad, ki nongïalam ka BJP naduh u President Bah Ernest Mawrie bad ki heh nongïalam ka BJP ha Delhi kim don jingtip shaphang kane, bad wat u Bah Hek u khlem ïathuh ne sam lem ïa kata ka khubor ha ka por ba u donlang ha ka jingïalang jong ka BJP ha ka sngi Ba-ar.
U Bah Sanbor u la ong ba lehse, kane ka dei tang ka jingleh shimet u Bah Hek ba u leit dih sha bad kita ki MLA ka TMC, namar katkum ka rukom, kat kane ka kam, ka la dei ban ïaid lang lyngba u President ka BJP ha Jylla, bad u dei ban tip kat ïa kata ka khubor babha lada ki MLA ka TMC ki kwah ban ïa long kawei noh bad ka BJP.
Nalor kata, u Bah Sanbor u la ong ba lada ym dei ka jingleh shimet u Bah Hek, ki nongïalam ka BJP na Delhi ruh khlem pep kin ïoh jingtip bad ïa kata ka jingtip, kin sam sha ki nongïalam ka BJP ha Jylla bad kin bthah ruh ban nang pynbit pynbiang la ka dei ban phah wan ïa ki MLA sha Delhi ne ki nongïalam ka BJP na Delhi kin wan hi sha Meghalaya ban ïakynduh ïa ki MLA kiba dei ban ïasoh bad ka BJP.
Shuh shuh u la ong ba wat ha kamra jong u, ki don bun ngut ki MLA na ki seng saiñ pyrthei bapher bapher kiba ïakynduh ïa u bad dih sha, hynrei kam mut ba ka jingdih sha kan dei noh ka jingkwah ïasoh sha kawei pat ka seng.
Kum ban shu pynkynmaw ha kine ki khyndiat sngi, u Bah Hek u la kam ba u la ïoh ban dih sha bad ki ar ngut ki MLA ka TMC, u Bah Charles Pyngrope bad u Dr Mukul Sangma ha kaba la ïakren bad ki shaphang ka lad ba ki MLA ka TMC kin long kawei noh bad ka BJP.
U Bah Hek u la kam ruh ba kine ki MLA ka TMC ki la pynpaw ba kim sngew ei ei lada rung sha ka BJP, tangba ki dei ban peit thuh shwa ïa ka jinglong jingman.
