Singapore, Iaïong:
ki pulit jong k Singapore ha ka Sngi Balang ki la sdien phasi ia uwei u runar uba don kti ha ka jingshalan ia u drok ‘Cannabis’, ha kaba katei ka tnat kam shym la pynsngap ia ka jingkyntu ia ki bor ba nabar bad na kylleng jong ka ri ban pyllait ia utei u runar na ka jingphasi hynrei ban shu ai da kiwei pat ki jait jingpynshitom.
La ong ba katei ka jingshim rai hi jong ka Singapore haba iadei bad katei ka kam, ka long ruh wat hadien ba ka United Nations Human Rights jong ka Singapore ka la kyntu ia ki bor ka Singapore ba kin pyrkhat arsien shuwa ban shim ia katei ka rai sdien phasi pyrshah ia utei u runar uba don kti ha katei ka kam khaïi drok.
Ia utei u briew, la ithuh kum u Tangaraju Suppiah bad u la don 46 snem ka rta bad la sdien phasi ia u hapoh ka Changi Prison Complex.
U Tangaraju u la shah kem noh ha u snem 2017 halor ka jingdon kti bad jingsuh buit haba iadei bad ka jingkhaïi ia u drok ‘Cannabis’ kumba 1,017.9 gram (35.9 ounce) bad la ong ba katei ka jingleh pynkheiñ aiñ jong u, ka la palat syndon haduh 2 shah ia ki kyndon ba la buh da ka Singapore.
Kumta, la rai sdien phasi ia u naduh u snem 2018, hynrei da ka jinglah jong ka ïingbishar ban tehlakam, la pynsangeh noh ia katei ka jingthmu ha utei u snem.
Katba, katkum ka jingthoh ba la ioh na ka Global Commission on Drug Policy na Geneva, ha ka Sngi Nyngkong ki heh jong katei ka tnat ki la iathuh ba u Tangaraju um shym don kti eiei halor katei ka kam ba la pharep bad kynnoh don kti ia u baroh shi katta bad kumta lada ka Singapore kan iaid shakhmat ia katei ka rai kaba ka la shim ha kitei ki snem, kamut ka la shim bakla ia ka jingim jong u ‘riew lui-lui u bym don dak eiei.
Hynrei, ka tnat kam poh iing jong ka Singapore, ha ka Sngi Ba-ar ka la jubab halor katei ka mat bad ka la ong ruh ba u Tangaraju u dei u runar uba don kti ha katei ka kam ha kitei ki snem ba la leit bad la lah ruh ban sakhi ia kata ha ki rukom bapher.
Katei ka tnat ka la iathuh ruh ba ha ki snem ba la leit, ka la ioh ban kurup noh ia 2 tylli ki mobile phone ba u Tangaraju u ju pyndonkam naka bynta ban leit pynpoi ia u drok sha kiba iadei kam bad u.
Namar kumba la iohi hi ba ym pat ju don kano- kano ruh ka ri ka ban rai sdien phasi ia ki nongpynkheiñ aiñ haba iadei bad ka jingkhaïi ne jingdon kti ha ki kam khaïi ia u drok ‘Cannabis’ bad kumta ruh la ong ba ki tnat bapher ki la ialeh katba lah ban tehlakam ia ki bor ka Singapore ban shim noh da kawei pat ka rai bad ba yn sangeh noh ia ka jingthmu ban sdien phasi ia utei u nongleh pynkheiñ hynrei la ong ba ka Singapore kam shym pynsngap ia kita baroh hynrei ka la shim ia ka rai ha ka kti lajong bad iaid shakhmat ban pyndep ia kaba la thmu baroh shi katta ki snem.
