Shillong, Ïaïong 26:
Ka Meghalaya Football Association (MFA) ka la pyllait ïa ka shap ne logo bad ka trophy na ka bynta ka Meghalaya State League (MSL) kaba lai kaba la thmu ban sdang naduh 12 tarik u Jymmang mynta u snem.
Ïa kane ka prokram la pynlong ha State Convention Center, Shillong ha ka Sngi Balang ha kaba la ïadon lang u President ka synjuk u Bah Larsing Ming Sawyan, kumjuh u Joint Secretary Bah Dipshon Ryntathiang, ki dkhot ka MFA, ki nongmihkhmat na ki synjuk ïalehkai bapher bapher, ki kapten na ki kynhun ïalehkai bad kiwei kiwei.
Ha kane ka lympung ki don haduh 25 tylli ki kynhun ki ban ïashim bynta na ki synjuk ïalehkai bapher bapher kiba la pynïasoh sha ka MFA.
Ïa kane ka lympung yn pynlong ha ki saw tylli ki jaka; kita ha Shillong, Tura, Jowai bad Mawkyrwat, katba ïa ka jingïakhun final yn pynlong ha ka nongbah Shillong.
Ki kynhun ki ban ïakhun nyngkong ha katei ka sngi plie kin long hapdeng ka Rangdajied United FC (ba wan ba-ar ha u 2019) pyrshah ïa ka lahduh jong u 2017-18 ka Hynñiew Wasa FC ha ka 12 tarik u Jymmang ha Kiang Nangbah Stadium, Jowai.
Ka lahduh ha kane ka lympung kan ïoh khur ïa ka song pisa kaba T. 5 lak, katba ka kynhun ba wan ba-ar kan ïoh T. 3 lak tyngka.
Ha kane ka sngi la plie ruh ïa ka website (themsl.in) jong ka Meghalaya Football Association da u President ka MFA bad kumjuh ïa ka jingrwai (theme song) jong kane ka lympung ba la rwai da ka samla Jessie Lyngdoh lem bad ka kynhun.
Kum ban shu pynkynmaw, ïa kane ka lympung la pynlong khatduh ha u snem 2019 ha kaba ka Shillong Lajong FC ka la rah ïa ka nam lahduh. Hadien kane ym shym la lah shuh ban pynlong na ka daw ka jingwan lynshop jong ka khlam COVID-19.
Kumta ïa ki lympung ïalehkai bapher bapher hapoh ka Jylla la lah ban pynlong biang ha u snem ba la dep. Dei halor kane ka nongrim ba ka MFA ka la thmu ban pynlong biang ïa ka MSL na ka bynta ban plie lad ïa ki kynhun kiba kynsai ba la pynlong da ki synjuk ïalehkai bapher bapher kiba la pynïasoh sha ka MFA ba kin ïashim bynta mynta u snem.
Haba ai jingkren ha kane ka sngi, u Bah Larsing u la pynpaw ba ka MSL ka long ka jingïaid lynti kaba thymmai. “Kane ka lympung ka la wanphai biang ha ryngkat bad ka jingïohi jngai na ka bynta ban kyntiew ïa ka jingïalehkai phutbol sha kawei pat ka kyrdan.”
Kham ha shwa u Bah Dipshon u la ong ba ka long ka jingjop ïa ka kynhun ïalehkai ka Jylla ha ka Santosh Trophy ha kaba ka la wan ha ka kyrdan ba-ar hadien ba shah rem ha ka Karnataka.
U Bah Larsing u la bynrap biang da kaba ong, “Mynta ka Santosh Trophy ka la long kaba kham eh. Ka Meghalaya ka la ïoh rung sha ka wat khatduh ha ki saw bad san snem mynshwa. Hynrei da ka jingïeit bad kyrshan jong ki paidbah bad kynhun ïalehkai ka Jylla mynta u snem ka la lah ban rung shaduh ka final, wat la kam shym la lah ban khur ïa ka nam lahduh.”
