Camp Nou, ïaïong:
Katkum ka jngpyllait khubor da ka klob ialehkai phutbol na Spain ka Barcelona, ka iathuh ba katei ka klob ialehkai ha ka lympung Spanish La Liga ka lah nang iai pynkiew shuh shuh ia ka song pisa jong ka sha ka 1.45 billion euros ($1.6 billion) ha ka jingmang pisa da katei ka klob na ka bynta ban thaw thymmai biang ia ka madan ialehkai ka Camp Nou ha ka 1 tarik u Jylliew.
Kumta na ka liang jong katei ka klob ka iathuh ruh ba katei ka pisa kaba lah nang pynkiew bun shah ha kaba iadei bad katei ka jingthmu ka wan na ki jingiateh bad ki 20 tylli ki jing-iadonbynta ha ka jingpynlut ki ban sa ioh ia ka jingshah siew kylliang biang ha palat ka samoi hapdeng ka 5 bad 24 snem. Katei ka klob ka iathuh ba kan sa sdang ruh ha ka ban siew noh ia ka ram jong ka ynda lah pyndep pura ia ka kam.
Da kaba bynrap ruh ha kaba bad katei ka madan ialehkai ia kaba lah thmu ban khot ‘Espai Barca’, ka kynthup ia ka jingpynlut ha kiwei pat ki jingdonkam jong ka klob. Kata ruh ka kynhun ia ka 420m euros ba lah pruid dak lypa na ka bynta ka Palau Blaugrana, ka kynhun ialehkai Basketball bad Handball jong ka ri bad ka 20m euros ia kaba lah mang na ka bynta ka madan ialehkai ka Johan Cruyff.
Shuh shuh ruh katei ka klob ka iathuh ruh ba ka don ia ka jingkhmih lynti ba ki kam ki jam baroh ha kaba iadei bad katei ka bynta jong ka klob yn pyndep noh la kumno kumno haduh u snem 2026.
Kumta ka kynhun ialehkai 1st XI jong ki shynrang kan ialehkai ha Olympic stadium ha Montjuic ha shuwa ban wanphai sha ka aiom ialehkai 2024-25 sha Camp Nou.
Katei ka klob ka lah mad ruh ia ki jingeh bakhraw ha kaba iadei bad ka pla pisa ka jong ka kaba lah pei baroh shi katta tad haduh ba kan da ialam ia ka kynhun ialehkai baroh kawei ban duhnong haduh 481 million euros ha ka aiom ialehkai 2020/21 kaba lah wanrah ruh ia ka jinghap ban mihnoh jong u khlur ialehkai ba lah rim tam ka kynhun u Lionel Messi.
