Nongstoiñ, Ïaïong 26:
Ka kynhun ki ’rang ïalehkai jong ka Mawshynrut Block bad ka Rambrai Block ki la jam sha ka final ha ka lympung ïalehkai ba la tip kum ka Chief Minister District Level Under-12 Football Tournament 2023 ba la pynlong da ka shlem trei kam jong ka District Sports Officer (DSO) West Khasi Hills.
Katei ka nam jop jong ka Rambrai Block ka la wan hadien ba lah pynliem noh ïa ka Shallang Block da 2-0 kol ha ka jingïakhun semi final kaba la long ha ka Sngi Balang ha madan NDSA Nongpyndeng.
Katba ka nam jop jong ka Mawshynrut Block pat ka la wan hadien ba ka lah pynliem noh da 3-1 kol kaba la long ha kajuh ka sngi.
Haba phai pat sha ka jingïakhun semi final jong ki kynthei, ka Shallang Block ka la khur ïa ka jingjop hadien ba ka lah ban pynliem noh ïa ka Nongstoiñ Block da 1-0 kol. Kumta da katei ka jingjop ka Shallang Block ka la ïoh rung sha ka phainal.
Na ka liang jong ka shlem trei kam jong ka DSO Nongstoiñ ka la pyntip ba ka jingïalehkai phainal jong kane ka lympung kan long ha ka Sngi Palei (27 tarik). Ha ka liang ki kynthei kan long hapdeng ka Mawshynrut pyrshah ïa ka Shallang Block ha ka por 1 baje nohphai sngi, katba ha ka liang ki shynrang kan long hapdeng ka Mawshynrut pyrshah ïa ka Rambrai Block ha ka por 2:30 janmiet.
