London, ïaïong:
Ha ka thup kyrdan jong ki rangialehkai Kriket na ki ri bapher bapher ha ka ICC men’s T20I Player Rankings, katkum ka khubor ba la ioh lum ka iathuh ba u Mark Chapman na New Zealand bad u Iftikhar Ahmed na Pakistan ki lah kynjoh mynta sha ka kyrdan kaba biang tam eh ha ka jingim ialehkai ka jong ki ha kaba kut jong ki san tylli ki jingiakhun hapdeng kitei ki ar kynhun ialehkai ha Rawalpindi.
Nangta ha kaba iadei bad katei ka bynta jong ka thup kyrdan ki nongialehkai T20Is, u nongtied ba tbit tam ka India u Suryakumar Yadav sa shisien ha ka wat ba mynta ruh u dang iai bat ia ka kyrdan ba nyngkong tam eh. U long tang ma u napdeng ki nong-ialehkai ka ri ban dang iaisah ha ka thup ba 10. Ka khubor ka iathuh ruh ba u Chapman uba la lah ban thlieh haduh 71 ron khlem shah pynhap wiket na ki 42 bol bad 104 ron na ki 57 bol na kita ki ar tylli ki jing-ialehkai na ka bynta ban pyndep ia ka jingialehkai da kaba wan hajrongeh ha ka jinglah ban kyntiew aggregate da 290 ron, u lah kynjoh mynta da saw phew-phra jaka sha ka kyrdan ba 35, naba ka kyrdan ba mynshuwa ka jong u ka long da 54 kaba u lah kynjoh ha u Rymphang 2018.
Kumjuh ruh u Iftikhar uba lah kamai ia ki 36 ron ha ka jingialehkai ba khatduh, u lah kiew mynta da hynriew jaka na ka bynta ban kynjohlah sha ka jaka ba 38. U long u nongialehkai balai jong ka Pakistan ban lah kynjoh sha ki jaka ba kham shajrong hadien u nongtied ba paw ka kynhun u Mohammad Rizwan ( uba lah kiew na ka 798 rating points sha ka 811 hadien ba u lah kamai 98 ron khlem shah pynliem ha ka jingialehkai ba khatduh) bad u Babar Azam uba bat ia ka kyrdan ba-ar bad balai ha ka thup kyrdan hapoh ka jingialam jong u Suryakumar Yadav kum uba nyngkong eh ha ka thup.
Kiwei pat kiba lah kiew kyrdan ha katei ka thup ba mynta ki long ki nongialehkai ka New Zealand u Chad Bowes ( da 82 jaka sha ka kyrdan ba 118 ha ka thup ki nongtied) bad u Ish Sodhi ( da ar jaka sha ka kyrdan ba 14 ha ka thup ki nongkawang bol) katba u rang-ialehkai All Rounder ka Pakistan u Imad Wasim u lah kiew kyrdan ha baroh ki lai tylli ki thup kyrdan ialehkai.
Shuh shuh ruh u Imad u lah kiew da 15 jaka sha ka kyrdan ba 127 hapdeng ki nongtied hadien ba u lah kamai ia ki 31 ron ha ka jingialehkai katba ki 3 wiket kiba u lah kamai na ka bynta ki 19 bad 2 ha ka 21 ron ki lah kyntiew ia u da 120 jaka sha ka kyrdan ba 93 ha ka thup ki nongkawangbol bad u long ruh uba lah kiew da 44 jaka sha ka kyrdan ba 24 hapdeng ki ‘All Rounders’.
Ha ka jingpynthymmai thup kyrdan ba man ka taiew jong ka ODIs, kaba lah jied ia ki nongialehkai katkum ka rukom ialehkai jong ki ha ki jingialehkai ha Oman-Nepal jong ka ACC Men’s Premier Cup ha Kirtipur, u nongkawang bol ka Nepal u Sandeep Lamichhane u lah shah kyntiew mynta da shi jaka sha ka kyrdan ba 22 hapdeng ki nongkawang bol hadien ba u lah pyndep da 3 wiket na ka bynta ki 45 katba ki 108 u Kushal Malla na ki 64 bol ki lah kyntiew ia u da haduh 35 jaka sha ka kyrdan ba 110. Kumta ruh u nongkawangbol spin ka Oman u Zeeshan Maqsood u lah kiew da ar jaka sha ka kyrdan ba 49 ha ka thup ki nongkawang bol.
