Kolkata, ïaïong:
Katkum ka khubor ba lah ioh lum ka iathuh ba u nongialam barim jong ka Bengaluru FC u Carles Cuadrat mynta ka kynti u lah shah khwai ha kawei pat ka kynhun ialehkai phutbol ha ka lympung Indian Super League (ISL) ka East Bengal kum u nongialam ba thymmai jong ka kynhun ha ryngkat bad ka jingiateh kontrak kaba ar snem.
Ka khubor ka iathuh ruh ba u Cuadrat u lah sdang ia ka tei ka kam shakri ka jong u ha India nyngkongeh kum u symbud nongialam jong ka Bengaluru FC (BFC) ha u 2016.
Kumta ha ka samoi treikam ba nyngkong ka jong u hapdeng jong u snem 2016 bad 2018, ka BFC ka lah rah ia ka jingjop ha ka Federation Cup bud pat sa ha ka bynta ba nyngkong jong ka Super Cup bad kaba lah kylla long ruh ka kynhun ialehkai ba nyngkongeh jong ka ri ban kynjoh shaduh ka jingiakhun phainal ha ka AFC Cup.
Ha u snem 2018, u Cuadrat u lah shimti kum u nongpyniaid bahakhliehduh ka BFC ha kaba u lah ialam ia ka kynhun baroh kawei sha ka jingkhur trophy kaba lai sien kynthih ha ka Indian Super League (ISL) ha ka aiom ialehkai jong u snem 2018-19.
Hapoh ka jingialam ka jong u, ka BFC ka lah kylla long ka kynhun ialehkai kaba nyngkong eh ha ka khana-pateng jong ka lympung ialehkai ISL ban kiew sha ka kyrdan ba ha kliar eh ha ka lympung bad rah ia ka jingjop ha ryngkat bad ka trophy ha ujuh u snem.
Ha ka aiom ialehkai kaba bud, u Cuadrat u lah ialam ia ka kynhun sa shisien biang sha ka Play-Offs bad hapoh jong u, ka BFC ka la lah ban thaw shibun ki rekod.
Ha ka aiom ialehkai 2018-19 katei ka kynhun ka lah don ia ki 11 jingialehkai ba khlem shah pynrem ka jong ka kynthup ia ki hynriew sien jop ba ka lah khur, kaba long ka rekod kaba jrong tam eh ha ka jingiaid lynti ba khlem shah pynliem ka jong ka ha ka ISL.
