Shillong, Ïaïong 26:
U Myntri ka tnat bording, u AT Mondal u la ong ba ym pat don kano kano ka jingkylla haba ïadei bad ka por pynlip ding ilektrik ha baroh kawei ka Jylla namar ba ki jaka pynmih bording ilektrik ruh kim pat pyni dak ba ka um ka la kham biang.
U Mondal u la ong ba ka jinglong jingman kam ai jingshngaiñ khamtam haba ka um kam kiew namar ka jingduna ka jinghap slap ha kine ki bnai.
Nangta, u la ong ym kum ha u snem ba la dep ha kaba la sdang hap slap naduh u Rymphang, hynrei u la ong ba mynta u snem, ka jinghap slap ka duna bha.
Nalor kata, u la ong ruh ba ka dor jong ka bording ban thied ha kane ka por ka heh bha, nalor ba ka Jylla ka la ju thied ha ka dor kaba kham heh la katta snem.
Shuh shuh u la ong na ka daw ka jingrang tyrkhong ka mariang ka buh jingeh bha bad lada ka ïai bteng kumne khlem hap slap, wat ka jaka pynmih bording ilektrik ha Umïam ruh kan kynduh jingeh namar ka um ka hiar bha.
Kumta u la ong ba ïa mynta, ka jingpynlip bording ilektrik ha ka Jylla ka dang bteng katba ym pat hap slap bha ban pyndap ïa ka um ha ki jaka ba den ban pynmih bording.
Ka Meghalaya ka ju thied bording na kiwei pat kompani namar kam lah ban pyndap ïa ka jingdonkam bording ha Jylla lyngba ki projek bording kiba la don bad treikam.
Ka Jylla ka don ki projek pynmih bording ilektrik kum ka Umïam, Umtrew, Myntdu-Leshka, nalor ka Ganol kaba dang shu sdang shi unit ei ei.
Ka jingdonkam ïa ka ilektrik ka bun bha, hynrei ki projek kiba la don, ki lah ban pynmih tang khyndiat ka bording ilektrik khamtam ha kine ki bnai bym hap slap.
