New Delhi, ïaïong:
Ka France ha ka Sngi Ba-ar ka la ioh ban leit shaw noh ia 538 ngut ki briew na Sudan da ki liengsuiñ jongka, ha kaba 209 ngut ki dei ki paidbah jong ka France hi bad 329 ngut pat ki dei na kiwei pat ki ri kiba kynthup ia 5 ngut ki nong India.
Ka United Kingdom, ka France bad ka South Korea ki la pyntip ba ki la dep ban leit shaw noh ia ki paidbah jongki hadien ba u Secretary of State jong ka US – u Antony Blinken u la phah sangeh ia ka jingiasiat ha Sudan kumba 3 sngi.
Ka France ka la iathuh ruh ia ki jingeh haba iadei bad katei ka jingleit shaw ia kitei ki paidbah na Sudan namar ka jinglong-jingman ha katei ka ri kam long kaba biang bad kumta ruh ki la shu ialeh katba lah ban pynkloi bad ban pyllait im ia kat kiba ka lah ban ioh kit ha katei ka sien leit shaw jongka.
La ong ba ka France ha ka jingshisha ka la thmu hi ban kit lang bad kynthup lang beit ia ki paidbah jong kiwei ruh ki ri kiba dang don bad sahkut ha katei ka ri, hynrei kam lah pat ban tyngngian palat ia ka rukom ba dei ban kit bad kumta ka la ioh ban kit noh tang ia kat kiba kloi bad kiba wan shakhmat ha katei ka por ba ka la phah leit shaw.
La ong ba u President jong ka France, u Emmanuel Macron, ha ryngkat bad kiwei de ki Myntri ka France, ki la dep ban phone sha ki heh ka tnat shipai Sudan naka bynta ban ailad ia ka France ba kan phah ia ki shipai jong ka ba leit kit bad leit shaw ia kitei ki paidbah kat kiba ka France ka lah ban pynpoi sha Sudan ha katei ka sngi.
Bad kumta la ong ba kitei ki shipai jong ka France ki la sdang bna mih na ka Kad liengsuiñ jong ka France naduh ka por 6 baje jong ka step Sngi U Blei bad la ong ba kawei ka liengsuiñ ka lah ban kit kumba 100 ngut ki nongleit nongwan.
Shuh shuh ruh la ong ba ki shipai ka France ki la hap ban leit tan bad leit iarap ia kito kiba la sahkut bad sah marwei ha ki katto katne ki bynta jong ka Sudan hadien ba kim lah shuh ban pynpoi sha katei ka jaka hiar liengsuiñ, ha kaba kiba bun ki paidbah ki ialum lang shi jaka bad ki ap jingiarap.
Namarkata la ong ba katei ka jingleh jong ka France, ka la long ruh ka nuksa ia kiwei pat ki ri ba kin phah ia ki liengsuiñ jongki, naka bynta ban leit iarap bad leit shaw ia ki paidbah nongshong shnong jongki, kiba dang sahkut hapoh Sudan naduh shwa ban jia ka thma haduh kane ka kynti.
Ha ka Sngi Ba-ar, la ong ba ka France ka la phah ia ki shipai jong ka tnat Navy Frigate Lorraine naka bynta ban leit iarap haba iadei bad katei ka kam.
