C. B. Iawphniaw
Haba ia dei bad kane ka mat jingdawa ki seng long-kmie ban ia don bynta ha ka kam shnong kam thaw. Ka la dei ka por ban pynkylla katto katne ki rukom pyniaid shnong pyniaid thaw na ka bynta ka jingbha lang ia baroh. Ki kynhun jong ki seng longkmie ki kwah ban ia don bynta ha ka kam synshar khadar ha ki shnong ki thaw. La dei ia ka KHADC ba kan shim khia ban pynbeit ia kane na ka bynta ka bha ka miat hapoh ka shnong ki thaw. Hooid, katkum ka rukom pyniaid shnong pyn-iaid thaw u barim ka Bri u Hynniewtrep naduh mynshuwa, dei tang u shynrang u lah ban shong Dorbar shnong bad ban jied ia u Rangbah shnong bad ka dang neh haduh mynta ruh. Ban long Rangbah shong ruh dei tang u Rangbah shnong.
Hynrei mynta ki por kam ia hap shuh ban shu ia bat sah ia kajuh ka rukom pyniaid shnong pyniaid thaw tang ki rangbah. Ha ka jing-iohi kiba bun mynta ia ka kam Rangbah shnong dei ban pynneh ba dei tang u shynrang ne u rangbah uba lah ban bat kum u Rangbah shnong. Ai ba kane ka kam Rangbah shnong kan neh beit ha u shynrang kumba la buh u longshuwa manshuwa. Hynrei ka dei ban don ka jingkylla ha ka rukom jied ia u Rangbah Shnong/ Sordar la dei ban ai lad ban shah ia ki kynthei ruh ba kin ia don bynta ban jeid ia u Rangbah Shnong.
Lada lah ban leh ia kane kan bha shibun. Namar u Rangbah shnong u dei peit lang ia baroh shynrang bad kynthei hapoh shnong hapoh thaw. Bad lah ruh ban ai lad ban ia don bynta noh ia ki Longkmie kum ki dkhot ha ka Executive Committee jong ka shnong. Kane kan lah ban iarap ban pynkhlain bad pyniaid ryntih ia ka shnong hapoh thaw. Hooid ka don ka jingmaham u barim kaba ong kumne. Haba ia kynih ka syiar kynthei, ka pyrthei ka la wai.’ Kane ka thew beit ba ka kynthei kam bit ban ia don bynta ha ka Dorbar shnong ioh kan pynsniew dur ia ka Dorbar shnong. Hynrei ia kane mynta to ngin ia klet noh kat kum ka jingkylla jong ka por. Ki Seng longkmie ki ai daw ba mynta ki kynthei ki la don kiba long Prime Minister, ki President, ki Minister ha kylleng ki ri ka pyrthei. Kumno ym lah ban bat ia ka kam Rangbah Shnong ka kam kaba rit. Dei kane kaba ai mynsiem ia ki kynthei ka Bri u Hynñiewtrep ba kwah ban long Rangbah shnong.
Ha ka jingshisha ka kam Rangbah shnong ka long kaba bha bad ka dang kham lah ia ki kynthei ban ieng MLA/Minister ban ia ki ban bat ia ka kam Rangbah shnong. Ha kiwei kiwei ki bynta ka dei ban ai lad noh ia ki kynthei ban ia don bynta ha ka kam shnong kam thaw. Kane ka long ka jingiohi jong ngi kum ki ‘riew paidbah.
