Stockholm, ïaïong:
Katkum ki khubor la ong ba uwei u roket ‘Research Rocket’ ba la pynher da ka Sweden Space Corp ha ka step jong ka Sngi Nyngkong na ka jaka pynher Esrange Space Center na North Sweden u la leit ban hap bakla sha kumba 15km (9.32 miles) shapoh u pud u sam jong ka Norway ha katei ka sngi.
La ong ba utei u roket u la poi kumba 250 kilometre ka jingjngai na katei ka jaka ba la pynher ia u na Sweden.
Hynrei la ong ba da ka jingbakla bad ka jingbym biang, u la kum leit hap sha ki lum kumba 1,000 meter lane kumba 10 kilometer na ka jaka ba shongbriew ha Norway.
Kumta, katei ka kynhun pynher roket ka la iathuh ba ha katei ka step ka la pyntip sha ka sorkar Sweden bad kumjuh ruh sha ka sorkar Norway halor ka jingbym iaid beit ka jingthmu jongki haba iadei bad katei ka jingpynher ia utei u roket naka bynta ban peit thuh.
Namarkata, ki tnat ba dei khmih ki dang phah ia ki tnat wad bniah ban wad ia ka daw halor ka jingbym treikam pura jong utei u roket ha katei ka sngi ba la pynher ban peit thuh ia u.
Tad haduh ka step Sngi Palei, na ka liang ka tnat Civil Aviation Authority jong ka Norway kam pat shym la ai ktien ne jubab halor katei ka jingjia ha katei ka sngi.
