Shillong, Ïaïong 27:
Saw ngut ki nongïakhun kti ka Jylla ki la mih na ka nongbah ban leit shim bynta ha ka 21st Asian Arm Wrestling Championship ka ban long ha Dubai-Ajman, UAE naduh 28 tarik mynta u bnai haduh 4 tarik u Jymmang.
Kine ki kynthup ïa ka samla Airikmenlang Shabong 50kg na ka Youth category, Margaret Pathaw 60 kg na ka Master & Senior category, u Hubert Paliar 60kg na ka Hearing Impairment bad u Alexander Lyngdoh 80kg na ka Hearing Impairment.
Ha ka jingshisha ki la don hynriew ngut ki nongïalehkai kiba la shah jied ban leit ïashim bynta sha katei ka lympung, hynrei na ki daw bym lah kiar ki la hap ban leit noh sa tang saw ngut.
Kumba ka paw u Alexander u dei uba la khur ïa ka takma ksiar ha ka 32nd Annual State Arm Wrestling Championship 2023 ba la pynlong dangshen da ka Meghalaya Arm Wrestling Association ha kane ka nongbah, katba ka Airikmenlang bad u Hubert ki la khur ïa ka takma rupa.
