Ka sorkar Meghalaya haduh mynta kam pat lah ban wanrah ïa kano-kano ka jingkylla haba ïadei bad ka por pynlip ding ilektrik namarba ki jaka pynmih bording ilektrik ruh kim pat pyni dak ba ka um ka la kham biang. U slap uba la jaw ha kine ki khyndiat sngi um pat biang satia ban pyndap ïa ki shlem pynmih bording bad kane ka long kaba ma shi katdei. Lada ka jinghap slap kam biang, lehse ka bording kaba ngi ïoh mynta ruh kan nang duna bad ka Meghalaya Energy Corporation Limited (MeECL) kan nang hap ban pynjlan ïa ki kynta pynlip bording. Ka jingkyrduh um ruh kan kham jubor namar ki tyllong um ki la nang rit na ka daw jong ka jingbym don slap. Wat la ka jingshit ka la kham duna ha kine ki khyndiat sngi kaba la pyllait ïa ki nongshong shnong na ka jinglynga jingpisa, hynrei ka dang don jingma pat namar ka jingtyrkhong um.
Ngi sngewlyngngoh ba ka Meghalaya, kaba don bun bah u dewïong, ka khlem pat lah ban shna tang kawei ruh ka shlem pynmih bording ba pyndonkam da u dewïong lane ka Thermal Power Plant. Ha ka jingshisha, la 51 snem ngi la dei ban don la kumno-kumno artylli kiba kum kine ki shlem pynmih bording – kawei ha East Jaiñtia Hills bad kawei ha South Garo Hills – namar kine ki dei ki thaiñ kiba bun eh u dewïong. Lada dei ba ka sorkar jylla ka la pyrkhat naduh mynshwa, lehse ngin ym kyrduh bording kumne mynta. Ngim donkam ban thied dewïong nabar jylla namar tang uba la don lypa ruh u la bun bad kane hi kan pynhiar ïa ka bai pyndonkam bording jong ki paidbah. Ha kajuh ka por, ka jylla ka lah ban die kylla ïa ka bording kaba kam lah ban pyndonkam sha kiwei pat ki jylla bad ka Meghalaya kan ïoh ïa ka lad ban kamai pisa.
Ngi dei ka jylla kaba riewspah lada ngi nang ban pyndonkam ïa ka spah mariang. Kumba ka long mynta, u dewïong u leit lut shabar jylla bad shabar ri. Ka por kam pat dier ïa ka MeECL bad ka sorkar jylla ban pyrkhat halor ka jingthaw ïa ki Thermal Power Plant namar ngi dang don kyrhai u dewïong ha kylleng. Ka jinglut kaba hap ban theh ban pynïeng ïa kine ki shlem pynmih bording ka lah ban mih noh tang hapdeng katto katne snem na ka jingdie ïa ka bording bym lah pyndonkam shabar ri. Ngim lah ban shu shaniah sah ha u slap ban ïoh ïa ka bording kumba ka long baroh shi katta. Ka la dei ka por ban pyrkhat thymmai. Haduh mynta ngim pat lah ban den ïa kiba bun ki jaka khnang ba ka um slap kan ym tuid ei sha Bangladesh bad Assam, bad kiba bun ki jaka ki long lum bad kan eh shibun ban den ïa ki. Ka jingbym lah ban pynlang ïa ka um ka wanrah ïa ka jingtyrkhong. Hynrei haba ka lynti kam shah, ngi hap ban pyrkhat da kiwei pat ki lad khnang ba ngin lah ban ïaid shakhmat.
Kane ka jingpynlip bording ba khah-khah ka ktah lut nadong shadong khamtam ïa ki karkhana. Ngi ïa ud ïa nam ba ki karkhana kim mon ban wan shane sha jylla, hynrei mano ban wan lada tang ïa ka bording ruh ym lah ban pynbiang? Ki nongseng kam seng kam ruh kin kynran dien ban wan sha kane ka jylla namar ka jingbym lah pynbiang ïa ka bording. Kaei ka shlem treikam mynta ka ban ïaid khlem bording? Hooid, ka sorkar ka pynshlur bha ïa ki nongshong shnong ban pyndonkam ïa ka bording ba tan na ka Sngi, hynrei katno eh ki ban leh ban leh kumta namar ka jinglut ruh ka bun? La jan don shi bnai naduh ba ka MeECL ka la hap ban pynlip bording da ki phew kynta ha baroh kawei ka jylla. Ka jingduhnong na ka bynta ki nongseng kam bad ki karkhana kam dei kaba kai. Mano ban siew ïa kata ka jingduhnong baroh?
Ha kajuh ka por, ki paidbah ki kyrmen ba ka MeECL kan ym ai ‘bill’ kulmar namar ki la mad ïa ka jinglip bording kaba da ki phew kynta. Kam lah ban long ba ka bai pyndonkam bording jong une u bnai kan kiew khlem nongrim. Ki paidbah ki dei ban mih shakhmat lada don ka jingpynkiew ïa ka bai pyndonkam bording bad kim dei ban ailad ïa ka MeECL ba kan leh thurmur. Ka dor ka dei ban ïa biang bad ka jingpyndonkam ïa ka bording.
