New Delhi, ïaïong:

Na ka liang jong ka synjuk pyniaid jingialehkai Kriket hapoh ka ri India ka Board of Control for Cricket in India (BCCI) ka pynbna khubor ba ka la pynkhreh mynta ia ka jing-iateh kontrak kaba shi snem kynthih ia kaba la tip kum ka ‘Player Retainership’ na ka bynta ki t’hei ialehkai Kriket jong ka ri India.

Kumta ha kaba iadei bad katei ka bynta, ka khubor ba la ioh lum ka iathuh ruh ba ka kapten jong ka kynhun ialehkai ka ri ka Harmanpreet Kaur, ka symbud kapten ka Smriti Mandhana bad ka nongialehkai kaba lah ban ialehkai ha baroh ki bynta jong ka jingialehkai (All-Rounder) ka Deepti Sharma ki long mynta kiba lah shah pynrung ha ka kyrdan kaba hajrong eh (Grade A).

Nangta ka nongkawang bol (spin) ka Rajeshwari Gayakwad ka la shah pynhiar mynta sha ka kyrdan B, katba kawei ka nongkawang bol (spin) ka Poonam Yadav kaba la don ha ka kyrdan A ha u snem ba lah dep, mynta kam shym la ioh kano kano ka jingiateh kontrak. Kane ka wan hadien ba kam shym lah ban ialehkai bha bad hiar noh na ka kyrdan ba ka bat baroh shi katta. Kane ka ‘thei ialehkai ka la ialehkai khatduh eh na ka bynta ka ri ha u Lber 2022.

Kumta ha ka jingpyllait paidbah ia ka kaiphod da ka synjuk, ka pynpaw ba katei ka synjuk bahakhliehduh ka pynbna ruh ia ka jingiateh kontrak ba shi snem bad ki nongialehkai na ka bynta ka kynhun ialehkai kiba lah san jong ka kynhun ialehkai ki kynthei na ka bynta ka jingiateh jong ka aiom ialehkai 2022-23. Hynrei na ka liang jong katei ka synjuk kam shym lah pynpaw shai ne batai bniang ha kaba iadei bad ka rukom siew ka jong ka na ka bynta man la kawei-pa-kawei ka kyrdan ha katei ka jingpyllait ia ka kaiphod.

Ka jingpynneh ka jingiateh kaba haduh shi snem ka lah urlong khatduh eh ha ka jingpynbna da ka BCCI na ka bynta ka aiom ialehkai 2020-21; ha kaba ki nongialehkai ki lah shah phiah ha ki lai kyrdan; kata ki nongialehkai ha ka Grade A ki ioh ban khur ia ka jingsiew kaba shi snem kata INR 50 lak katba ki nongialehkai ha ka Grade B ki ioh ban kamai INR 30 lak bad na ka bynta ki nongialehkai ha ka Grade C, ka jingsiew kaba shi snem kaba ki ioh ka long INR 10 lak.

Shuh shuh ruh ka khubor ka iathuh ba a Shikha Pandey kaba la lah ban wanphai biang sha ka kam ialehkai na ka bynta ki jingiakhun T20 World Cup ha South Africa ka shem halade mynta ia ka jingbym shym la ioh kano kano ka jingiateh kontrak bad kaba lah jia kumjuh ruh ia ka nongap-wiket ka kynhun ka Taniya Bhatia; katba ka Pacer Renuka Thakur, ka bym shym la ioh ia ka jingiateh ha u snem ba lah dep, ka lah shah pynrung beit mynta sha ka kyrdan B hadien ka jingialehkai bha jong ka ha ka aiom ialehkai ba mynta.

Ha katei ka jingiateh ba thymmai, ka Richa Ghosh bad Jemimah Rodrigues ki lah kiew mynta na ka kyrdan C sha ka B, bad kiba lah rung thymmai sha ka kyrdan C ki kynthup ia ka Meghna Singh, Devika Vaidya, S Meghana, Radha Yadav, Anjali Sarvani bad ka Yastika Bhatia.

Ha ka jingpynbna khubor jong ka BCCI ha u snem ba lah dep, katei ka synjuk ka lah pynpaw ruh ia ki nongialehkai Kriket ka ri Shynrang bad Kynthei kin ioh ha ka ban kamai mar katjuh ka jingsiew bad kata ka thew ruh ba kumba shah siew da ka kynhun ialehkai ki shynrang kumta ruh ka kynhun ialehkai jong ki kynthei kan ioh ban kamai INR 15 lakh na bynta ka jingialehkai Test, INR 6 lak na ka bynta ka ODI, bad INR 3 lak na bynta ka T20I.

Kham mynshuwa katei ka kynhun ialehkai ka ju iai kamai INR 1 lak na ka bynta ka jingmih madan ka kynhun ha ka jingialehkai ODI ne T20Is bad INR 2.5 lak na ka bynta ka jingialehkai Test.

Kumta kine harum ki long kita ki kyrdan ha kaba ki nongialehkai ki lah shah kyntiew bad shah pynhiar ha ka jingiateh ba mynta:-

Grade A

1.Ms. Harmanpreet Kaur

2.Ms. Smriti Mandhana

3.Ms. Deepti Sharma

Grade B

1.Ms Renuka Thakur

2.Ms. Jemimah Rodrigues

3.Ms. Shafali Verma

4.Ms. Richa Ghosh

5.Ms. Rajeshwari Gayakwad

Grade C