Bogota, Iaiong:
Na ka liang jong ka synjuk pyniaid jingialehkai phutbol ka thain Shathie jong ka ri America ka South American Country’s Football Federation, ka iathuh ba ka kynhun ialehkai bol jong ka ri Colombia kan pynkhreh ialade mynta na ka bynta ki jingiakhun ha ka jingiaknieh jaka na ka bynta ka lympung ialehkai World Cup jong ka FIFA ka ban sa long pat ha u snem 2026. Ha shwa kata, katei ka kynhun kan pynkhreh ia ar tylli ki jingialehkai paralok pyrshah ia ka Iraq bad Germany.
Kumta ha kaba iadei bad katei ka bynta, katei ka kynhun ialehkai kan iakynduh nyngkongeh shuwa bad ka Iraq ha Valencia ha ka 16 tarik u bnai Jylliew bud pat sa ka jingialehkai paralok bad ka Germany ha Gelsenkirchen sa sngi hadien ka jingiakhun bad ka Iraq. Kitei ki jingialehkai kan long ruh kawei na ki lad ki lynti jong u nongialam bahakhmat ka kynhun u Nestor Lorenzo na ka bynta ban tynjuh ia ka kynhun ialehkai ka jong u ha shuwa ka South America’s World Cup Qualifiers ka ban sdang ha u bnai Nailur.
Naduh ba u Nestor u lah shimti ha ka ban pyniaid ia ki kam ki jam ha ka kynhun kum u nongmih bujli jong u Reinaldo Rueda naduh u bnai Jylliew jong u snem ba lah leit noh, katei ka kynhun ialehkai hapoh ka jingialam ka jong u kam pat shym la mad satia kano kano ka jingshah pynrem ha ki hynriew tylli ki jingialehkai ba ka iakhun. Kumba ka long mynta, katei ka kynhun ialehkai jong ka dang shong mynta ha ka kyrdan ba 17 jong ka thup kyrdan ka FIFA ha kylleng ka pyrthei; kata da lai jaka hadien ka Germany bad ka Iraq pat ha ka kyrdan ba 67.
