Shillong, Ïaïong 27:
U Jaden Pariat uba long u nongñiah kali jong ka Argenti Motorsport u la lah ban pynpaw ïa ka jingtbit lyngba ka sap kaba u don ha kaba u la lah ban khur ïa ka jingjop ha ka wat kaba nyngkong jong ka ROKiT British F4 Championship kaba la long ha Donington Park ha ka Leicestershire, England.
Une u khlur nongñiah kali ka Jylla u la long uba ar napoh ri India ban khur jingjop ha ka jingïakob ñiah kali, kata hadien u Kush Maini uba la khur jingjop ha u 2017.
“Ngi dap da ka jingsngewkmen da kaba ai jingkhublei ïa baroh kiba la don ha syndah bad ngi, la ong u Atikur Rehman; uba long u nongñiah kali barim jong ka ri bad uba long ha lyndet ban btin lynti ïa u Jaden.
U Jaden u la lah ban khur ïa ka jingjop bad um shym la ailad ïa kiwei ki para nongñiah. Une u nongñiah uba dang 16 snem ka rta na Minerva Virtual School, Lyca Radio u la wan ha ka kyrdan balai ha ka Race 2.
“Nga la ïoh jingkyrshan na baroh kiba na Lyca Radio bad kumjuh na ka kynhun jong nga. Kumta nga khmih lynti ban bteng biang sa ïa kawei pat ka jingïakob ñiah kali,” la pynpaw u Jaden.
Ïa kiwei pat ki lai tylli ki jingïakob pynher kali yn pynlong ha Brands Hatch ha ka 6 bad 7 tarik u Jymmang.
