Bhubaneswar, ïaïong:
Na ka liang jong ka sorkar Odisha ka la shim ia ka rai na ka bynta ka jingnang iai pynjlan shuh shuh ia ka jingiai kyrshan ha ka liang ka pisa-tyngka (Sponsorship) na ka bynta ka kynhun ialehkai Hockey jong ki shynrang bad kynthei ruh kumjuh kaba kynthup naduh ka kynhun ialehkai ba la san (Senior) bad khynnah (Junior) sa na ka bynta ki 10 snem ki ban wan kata naduh u snem 2023-2033.
Ia katei ka rai la shim ha ka jingialang jong ka kynhun Myntri hapoh ka jingialam jong ka Myntri Rangbah ka jylla u Naveen Patnaik. Ha ka sngi jong ka jingialang katei ka kynhun ka lah pdiang ia ki 15 tylli ki jingtyrwa bapher bapher ia kaba la phah da ki tnad bapher bapher. Kumta naba ka jylla Odisha ka ju iai long ka nongkyrshan ba kyrpang tam eh na ka bynta ki kynhun ialehkai Hockey ka ri naduh u snem 2018, kumjuh ruh kane ka jingkyrshan biang ka jong ka mynta kan long ka sienjam kaba kyrpang tam eh ha ka jingiaid lynti jong ka jingnang iai pynkhie-im ia ka jing-ialehkai bad ka jingiai kyntiew shuh shuh ia ka jingialehkai ha ka ri baroh kawei. Dang shen ka Odisha Mining Corporation Limited (OMC) ka lah rung ruh sha ka jingiamyjur bad ka HI (Hockey India) hadien ka por ba lah kut jong ka jingmynjur bad ka sorkar na ka bynta ki jingai jingkyrshan ia ki kynhun ialehkai ka ri na ka bynta ka samoi iateh kaba san snem kata naduh u snem 2018 – 2023.
Katkum ka jingkyrpad na u nongpyniaid bahakhliehduh ka Hockey India na ka bynta ban iai pynjlan shuh shuh ia ka jingiateh, ka OMC Ltd ka lah wad ki lad ki lynti ban ioh ia ka jingmynjur biang sa shisien na ka kynhun Myntri kaba lah ioh ia ka jingiateh bad ka sorkar bad ha kaba ka OMC mynta ka lah aiti ialade na ka bynta ka jingai jingkyrshan ka jong ka sha ki ar kynhun ialehkai ka ri naduh mynta u snem haduh u k’lyngkot 2033 bad ka song pisa kaba haduh T. 434.12 klur ( laitnoh ki khajna ba donkam) yn sa pyllait da ka OMC sha ka Hockey India ha ki khyndiat por ki ban wan jong une u snem ba mynta.
Ha kawei pat ka rai ba lah shim da ka kynhun Myntri ka long ba ka lah shim ia ka rai na ka bynta ban pdiang ruh ia ka jingtyrwa jong ka Biju Setu Yojana (BSY) ha ka jingiai pynjlan biang ka jong ka sa shisien ia ka jingiateh haduh u 2025-26 ha ryngkat shuh shuh bad ka song pisa kaba T. 3,597.22 klur. Katei ka kynhun Myntri ka lah mynjur ruh ia ka jingkhur Tender na ka bynta ban pynbha shuh shuh ia ka Cuttack ring road sha ka 6-lane naduh Khannagar haduh Link Road hapoh ka State Sector-Road Development Programme.
