New Delhi, ïaïong:
U Secretary ki kam bar ri jong ka India, u Vinay Mohan Kwatra ha ka Sngi Palei u la iathuh ba ka India ha katei ka sngi ka la phah ia ka jhad INS Tarkash kaba lai na ka bynta ban leit sha Sudan ban wan kit ia ki paidbah kiba don na katei ka ri shapoh India. Kane ka wan jia hadien ba ki ar kynhun shipai ka Sudan ki dang ailad ia ki ri bapher bapher ba kin leit shaw ia ki briew lajong na katei ka ri.
U Kwatra u la kren ia kane ha ka por ba u dang ai jingkren sha ki lad pathai khubor jong ka tnat kam bar ri kaba dei khmih ha Kaveri, ia kaba la buh khnang da ka Sorkar India naka bynta ban leit iarap ia kitei ki nong India kiba sahkut hapoh Sudan.
Haba iadei bad kane, utei u Myntri u la iathuh ba ka sorkar India ka la dep pynkhreh lypa sa ia ki 2 tylli ki jhad INS lada dang donkam bad la ong ba ka jhad kaba nyngkong eh ba la phah sha Sudan naka bynta kane ka kam, ka dei ka jhad INS Sumedha bad ka la ioh ban kit kumba 300 ngut ki paidbah nong India ha ka sngi ba la lah, bad la ioh ban kit ia ki sha ka jaka sangeh jhad ha Jeddah bad ha ka Sngi Palei ka la mih biang na katei ka jaka ban leit biang pat sha Sudan naka bynta ban ioh leit shaw sa ia kiwei pat ki paidbah kiba bun bad kiba dang sahkut ha katei ka ri.
Namarkata ruh u la iathuh ba ka sorkar India ka la trei shitom katba lah ban ioh pyllait im noh ia kitei ki paidbah jong ka ri, kynthup naduh ka jingbuh ia ki jaka peit thuh lane ki ‘Control Room’ ha India bad kumjuh ruh ha Sudan khnang ba yn ioh ban peit thuh ia ka jinglong- jingman bad kumjuh ruh khnang ba yn lah ban pyniaid beit- pyniaid ryntih ia ki kam ki jam baroh kumba la thmu.
Kumjuh ruh u Myntri Rangbahduh ka India, u Narendra Modi haba ai jingkren hapoh ka jingialang ‘High Level Meeting’, u la bthah ia ki heh jong ka sorkar India ba kin shim khia halor ka jingpynpoi ia kitei ki paidbah nong India kiba don ha katei ka ri khnang ba kin poi suk- poi saiñ sha la ri bad ruh ba kin lait im na katei ka lanot kaba leit jia ha katei ka ri.
Nalor jong kitei ki jhad, la ong ba ka India ka la phah sa ia 2 tylli ki liengsuiñ C-130 jong ka tnat shipai liengsuiñ naka bynta ban leit khmih bad ban iarap haba donkam ha kum kane ka por. Kumba la dep pyntip mynne shakhmat, la buh ruh ia ki Control Room hapoh Jeddah bad ha ka jaka sangeh jhad ha Sudan khnang ba yn lah ban pyniaid beit ia ki kam- ki jam baroh.
Nalor kata, u Kwatra u la ai jingtip ruh sha ka Sorkar haba iadei bad ka jinglong jingman ha Sudan, kumjuh ruh haba iadei bad ka jingsangeh iasiat jong kitei ki ar kynhun shipai khnang ba ki ri bapher kin ioh ban leit shaw bad ban iada ia ki paidbah jong ki.
Hynrei la ong ba wat la katei ka jingiakhun ka la kham jaijai ban ailad ia kiwei pat ki ri ba kin leit shaw ia ki paidbah jong ki, hynrei ka jinglong- jingman ha katei ka jaka kam i-shngaiñ bad ka jingiakhun jongki ka dang bteng bad ka jur hi, ha ki katto katne ki bynta jong ka Sudan.
Haba la buh jingkylli pat ia u halor ka jingdon jong ki nong India hapoh Sudan, u Kwatra u la iathuh ba ia ka jingkheiñ ba pura ym lah ban ai jingpynshai, hynrei la shu buh jingkheiñ kyllum ba kin don kumba 3,500 ngut ki nong India kiba sahkut ha katei ka ri.
Shuh shuh u la iathuh ba u Myntri ka tnat kam bar ri jong ka India, u S.Jaishankar u la ioh ruh ban iakren bad kiwei pat ki myntri kam bar ri jong ki ri bapher kiba don ia ki paidbah jongki, kiba sahkut ha katei ka ri. Namarkata la ong ba u Jaishankar u la ioh ban iakren bad ki Myntri kam bar ri jong ka US, UAE, Saudi Arabia, Egypt bad kumjuh ruh ha ka miet ba la lah, u la ioh ban iakren ruh bad u Myntri jong ka United Kingdom (UK).
Ka United States ha ki khyndiat sngi ba la leit, ka la bthah ia ki heh jong kitei ki ar kynhun ki shipai jong ka Sudan, ba kin ailad ia kiwei pat ki ri ba kin leit ban shaw ia ki paidbah jongki bad kumta ruh ka US ka la phah kyntu ia kitei ki heh ba kin pynsangeh noh shwa ia katei ka thma da kumba 72 kynta.
