Galle, ïaïong:
Ha ka jingiakhun Test kaba khatduh hapdeng ka Sri Lanka pyrshah ia ka Ireland, ka khubor ka iathuh ba u nongkawang bol jong ka kynhun ialehkai ka Sri Lanka u Prabath Jayasuriya u la lah mynta ban pynpra noh ia ka rekod ba la 71 snem kynthih jong ka jingkhur wiket kaba 50 ha ka por ba u la pynhap wiket ia u nongtied ka Ireland u Paul Stirling na ka bynta ban khur shalade ia katei ka nam na katei ka jing-iakhun kaba ar jong ka jingialehkai.
Ka khubor ka iathuh ruh ba u Jayasuriya u la lah ban kynjoh sha katei ka bynta ka long ha ka jingialehkai test kaba hynniew na ka bynta ban pynpra noh ia ka rekod ba la thaw da u nongialehkai na West Indies u Alf Valentine. Utei u nongkawang bol (spin) u la lah ban kynjoh sha katei ka thong tang ha ki khyndiat tylli ki jingialehkai. U Jayasuriya u lah long u nongialehkai ba radbah naduh ba u lah paw bad kiew ha ka kam ialehkai Test ha ka jingim ka jong u, ha kaba u lah iohlad ha ka ban pynpaw ialade shakhmat ha ka jingiakhun pyrshah bad ka Australia ha u Naitung 2022.
Ka khubor ka iathuh ruh ba u Jayasuriya u lah khur ia ki 5 wiket ha ka shi innings ialehkai haduh hynriew sien kynthup ia ka 5 wiket ha ka 174 ron ha ka innings ba nyngkong jong ka Ireland jong ka jingiakhun test kaba ar ha Galle. Kumta ruh u donkam ia ki san wiket baroh ha ka innings kaba ar na ka bynta ban khur ia ki 10 wiket ha ka jngialehkai ha ka sien kaba lai. Kumta ruh, ha shua jong u, u Valentine u la long u nongialehkai ba dang iai bat ia ka rekod kaba u la lah ban thaw kloi hadien ka jingpawnam ka jong u ha u snem 1950 bad u long ruh tang ma u marwei uba hakhmat eh napdeng ki nongialehkai ban khur wiket kloi da 33 ha ki saw jingialehkai Test bad pynlong ia la ka jong ka kynhun ialehkai ban rah ia ka nam lahduh ha ka jingiakhun bad ka England ha ka sien kaba nyngkong.
Kumta utei u nongkawang bol ka WI u lah khur ia ka wiket ba 50 ha ka jngialehkai kaba saw jong ka jingleit ban iakhun ka kynhun sha Australia ha u snem 1951/52 bad uba lah kynjoh sha katei ka thong ha ka jingialehkai kaba phra bad thaw syndon ia ka rekod ka ban iaineh-iaisah palat 71 snem.
Hadien katei ka jinglah jong u Jayasuria ban pynpra ia katei ka rekod, utei u rangialehkai ka Sri Lanka mynta un lah ha ka ban thaw rekod shuh shuh kata ban kynjoh sa sha ka jingkhur wiket ba 100 ha ki khyndit tylli ki jingialehkai ki ban dang wan, hadien ba u nongialehkai na England u George Lohmann u long uba lah kloi ha ka ban kynjoh sha ki 100 wiket ha ki 16 tylli ki jingiakhun test jong u ha u snem 1896; katba u Clarrie Grimmett na Australia bad Yasir Shah na Pakistan ki long napdeng ki saw ngut ki nongkawangbol ban kynjoh sha ka thong ha ki 17 tylli jingiakhun test jong ki.
