Shillong, Ïaïong 28:
Ka Little Stars Football Academy bad ka Rahjingshai S.C.S.C kiba na ka Mairang Block ki la khur ïa ka nam lahduh ha ka Chief Minister Under-12 District Level Open Football Tournament jong ka Eastern West Khasi Hills District.
Ïa kane ka lympung ïalehkai ki khynnah la pynïaid da ka shlem treikam jong ka District Sports Officer (DSO), Eastern West Khasi Hills District ha madan Dommawlum kaba ha Pyndengumïong, Mairang.
Ha katei ka jingïakhun final jong ki kynthei kaba la long ha ka sngi Thohdieng, ka Little Stars (Mairang block) ka la pynliem noh ïa ka Nongshillong School (Mawthadraishan Block) da 5-0 kol. Katba ha ka liang ki shynrang, ka Rahjingshai (Mairang Block) ka la jop da 2-1 kol pyrshah ïa ka St. Joseph Higher Secondary School (Mawthadraishan Block).
Ïa ki khusnam sha ki nongjop la sam da u MDC ka Mairang u Bah Batskhem Ryntathiang kum u kongsan, kumjuh ka DSO Kong Balarina Syiem, Bah M.S.Lyngkhoi, Bah Glovis Basaïawmoit bad kiwei.
