Dubai, ïaïong:
Ka nongialehkai Badminton ba pawkhmat ka ri India kum ka P.V Sindhu bad u nongialehkai ba pawkhmat ha ka jingiakhun para marwei u H.S. Prannoy ki la nang iai pynieng skhem ia ka lama lai rong ka ri ha ka kyrdan iakhun para marwei wat la u Kidambi Srikanth u la khyllem noh na ka jingiakhun ha ka lympung Badminton Asia Championships 2023 ha ka rynsan iakhun pre-quarterfinal.
Haba phai sha ka jingjop jong kitei ki nongialehkai ka ri, ka Sindhu kaba lah ialehkai bha naduh kaba sdang jong ka jingiakhun pre-quarterfinal ba la lah ban pynrem noh ia ka nongiakhun pyrshah na China ka Han Yue da 21-12, 21-15 ha ka jingiaknieh rung jong ki sha ka quarterfinal.
Ha ka jingiakhun jong ki shynrang, u Prannoy u la lah ban pynrem noh ia u Chico Aura DWI Wardoyo na Indonesia da 21-16, 5-21, 21-18 ha ka jingiakhun pre-quarter ka jong u bad u Srikanth u lah mad noh ia ka jingshah rem ka jong u ha u nongialehkai na Japan u Kodai Naraoka da 21-14, 20-22, 21-9.
Kumjuh ruh na ka jingialehkai mar arngut ki shynrang, u Satwiksairaj Rankireddy & Chirag Shetty ki lah jam mynta sha ka quarterfinal da ka jinglah jong ki ban khur jingjop ha baroh kawei ka jingialehkai ha ka jingiakhun pyrshah bad ki rang na South Korea u Jin Yong & Na Sung Seung da 21-13, 21-11. Ka long ruh ka sngi ialehkai ba pynkmen ia ki kynhun ialehkai ka ri, ha kaba u Rohan Kapoor & ka Sikki Reddy ki lah jam sha kawei pat ka kylla na ka w/o ki shijur iakhun pyrshah na Korea u Seo Seung Jae & Chae Yu Jung ha ka pre-quarterfinal.
Shuh shuh ruh ha kawei pat ka jingialehkai, u B. Sumeeth Reddy & ka Ashwini Ashwini Ponnappa ki mad noh ia ka jingshah pynrem ha ki shijur iakhun na Chinese Taipei; u Chang Ko-Chi & Lee Chih Chen da 21-15, 21-17. Kumjuh ruh ka Treesa Jolly ha ka jingiatreilang bad ka Gayatri Gopichand ki lah mihnoh na ka lympung ha kaba ki lah ai da ka w/o sha ki thei iakhun pyrshah ka Jeong Na Eun & Kim Hye Jeong na South Korea ha ka pre-quarterfinal.
