Shillong, Ïaïong 28:
U nongkiew lum ka Jylla u Teimiki Sungoh na Shangpung, West Jaiñtia Hills District u la wan ha ka kyrdan ba nyngkong jong ka jingïakob kiew lum ba la tip kum ka ‘Rock Climbing Competition’ na ka bynta ka Advance Mountaineering Course ha Himalayan Mountaineering Institute (HMI) kaba ha Darjeeling.
Une u nongkiew lum uba don hapoh ka jingkhmih jong ka Meghalaya Sport Climbing & Mountaineering Association (MSC&MA) u la wan ha ka Grade “A”; kaba long ka kyrdan kaba heh ba ïoh ba la buh ryntih da ka Mountaineering Institutes na ka bynta ki nongïalehkai kiba la lah ban pynpaw ïa ka jingtbit ha kane ka jingshah hikai kaba don haduh 58 ngut ki nongïashim bynta na kylleng jong ka ri.
Katei ka prokram ka la sdang naduh 1 tarik haduh 28 tarik mynta u bnai bad la bei tyngka ïa utei u nongkiew lum da ka tnat ïalehkai jong ka Sorkar Jylla lyngba ka Meghalaya State Olympic Association.
Halor katei ka jinglah ban pynpaw ïa ka jingtbit, na ka liang ka President ka Kong Malviancy Shabong ha ka kyrwoh ka la pynpaw ïa ka jingsngew sarong halor ka jingjop u Teimiki uba dei u dkhot ka Executive jong kane ka synjuk.
Kat kum ki kyndon jong kane ka jingshah hikai, ki nongshah hikai kin hap ban pyndep da kaba ïashim bynta ha ki jingshah hikai ban kiew lum, kumjuh ha ki lum thah, lane ban shah hikai ha ki jaka ba long kynjang kiba don ïa ka jingjrong haduh 17,000ft na sla duriaw. Ki nongshah hikai ki dei ban long kiba biang naduh ka bor met bor phad bad kumjuh ha ka bor jabieng.
