C.B Iawphniaw
U briew u la stad mynta haduh u la leit ngam shapoh ki um duriaw bah bad u la leit her sha sahit bneng bad ha ki met bneng ban leit iuhkjat kum ha u bnai bad kiwei kiwei. Hynrei ym don uba lah ban pynjlan bad pynlyngkot ia ka rta la jong. Kumjuh ym don u briew uba lah ban pynioh kyrpang ialade ha ka hima u Blei.
Namar ha ka hima u Blei ym don jingiapher shuh kumba iapher ki jaitbynriew bapher bapher ha sla pyrthei. Baroh ha ka hima u Blei ki ia long ryngkat ym don jait ba poh ym don jait ba khraw.
Hangne ha pyrthei ngi don la ka jong ka jong ka kam ba ngi trei bad ngi bat, kum ki nongrep kiba im da ka kam rep, ki nongkhaii kiba im ka kam khaii, ki nonghikai skul, ki nongtih shyiap tih maw, ki nongdie dukan, ki mahajon bapher bapher, ki doktor ba peit nongpang, ki nongai dawai kynbat, ki nongniah kali, ki nongniah liengsuin, kiba trei kam sorkar bad kiba trei kam iada ri kum ki shipai bad bun kiwei kiwei ki rukom im hangne ha sla pyrthei.
Hynrei kine baroh kim donbor bad kim lah ba pynjlan bad pynlyngkot ia la ka rta la jong. Dei tang u Blei uba donbor uba lah ban leh ia kine kiei kiei baroh.
