Shillong, Ïaïong 30:
Wat la u Bah HM Shangpliang um shym la long shuh u MLA ka Mawsynram konstitwensi, hynrei um shym la iehnoh ïa ki paidbah haba ki ïakynduh jingeh. Une u MLA barim ka Mawsynram sa shisien la ïohi ba un mih madan ban leit kyrpad ïa u Myntri ka tnat Water Resources ka jylla, u Bah Comingone Ymbon ban leit jurip ïa ka Wah Umngi ha ka 28 tarik Ïaïong, 2023 namar ka jingshah bam ki ïing briew ha katei ka wah.
Ka jingshah pynjulor ka shnong Balat bad ka shnong Dangar ha ka Wah Umngi, khamtam eh ha ki por lyïur ka la pynlong ïa ki spah tylli ki ïing ban kynriah noh sha kiwei ki jaka.
Ka jingwan u Bah Comingone ban jurip ka dei na ka bynta ban buddien ïa ka jingshah bam ki jaka ha ka wah Umngi, khnang ba ki paidbah nongshong shnong jong kine ki lai tylli ki shnong kin ym sah ha ka jingsyier ha ka por slap bad halor ka jingdonkam ban leh noh da ka jingïada ba pura ban lait na ka jingshah bam duh.
Ïa u Bah Comingone ha kane ka sngi la synran lang da u MLA ka Ranikor, u Bah Pius Marweiñ lem bad u Bah Ollan Suiñ uba dei u MLA ka Mawsynram, katba ki ophisar kiba la poi lang ki kynthup naduh ka Chief Engineer ka tnat Water Resources ka Kong A.D Blah, u Superintendent Engineer u Bah L Suting, u Executive Engineer u Bah M.L Lawai, kynthup lang ruh ïa ki ar ngut ki SDO, ka Kong B Hynñiewta bad u Bah W.L Nari ha ryngkat bad u Superintendent Engineer ka Brahmaputra Board u Bah N Kharjana.
Na ka liang u Myntri ka tnat Water Resources u la sdang ïa ka jingjurip ha ka shnong Dangar Dop bad Lalpani kiba hap hapoh ka East Khasi Hills District. Ha kane ka jingjurip u la lap bad sakhi da la ki jong ki khmat ïa ka jingshah rong noh kawei ka surok ka ban leit sha border haat bad kumjuh ruh ha ka jaka ap pahara jong ki shipai ïada khappud ki Border Security Force bad kumjuh ruh ka jingshah rong noh ka jaka ker sainar shiah.
Hadien kane na ka liang u Bah Comingone ha ryngkat bad ki MLA lem bad ki ophisar ki la pynlong ruh sa kawei ka jingjurip ïa ka shnong Nongdisiar kaba don marjan bad ka shnong Umsawrang. Hangne ruh la ïohi ba ka Wah Umngi ka la sdang ban bam thymmai ïa ki jaka bad buh jingma kaba khraw ïa ki paidbah nongshong shnong.
Shuh shuh u Myntri u la pynlong ruh ka jingjurip ha ki bynta jong ka shnong Balat ha kaba la sakhi ruh ïa ka jingtrei jong ka Brahmaputra Board kaba la shna na ka bynta ban khanglad ïa ka Wah Umngi ba kan dang ïoh khlong biang ïa ka khyndew.
Na ka liang jong u Bah Comingone u la ong ba hadien ba u la dep ban jurip u la ïohi ba haduh katto ka Wah Umngi ka la pynjot ïa ki shnong ki thaw bad kumjuh ruh ïa ki ïing briew. Nangta u la bynrap shuh lada ai ïa ka jingïada kaba paka, donkam da ki spah spah klur tyngka na ka bynta ban khang lad shi syndon na ka jingbam jong ka wah, bad lada shu leh ban ïada tang shi por u la ong ba kan long kumba shu bret kai ïa ka pisa da ki klur tyngka.
