Ka jingkhlad ba kyndit jong kawei ka samla kaba pule ha ka skulbah Mody University ha Rajasthan ka la pynsuba sniew ym tang ïa ki bahaïing hasem, hynrei ïa ki paidbah ruh. Ki jingkylli kiba bun ki la mih halor ka rukom khlad jong kane ka samla, hynrei ki jubab kim pat shai. Kane ka samla ïa kaba la tip kyrteng kum ka Walinda Binong, 19 snem ka rta, kaba shong ba sah ha Nongagang Marngar ha Ri-Bhoi ka la khlad ha ka 27 tarik ïaïong, 2023, bad ïa ka met jong ka, la wan kit noh ha ka 30 tarik ïaïong, 2023. Na ka jingïathuh jong u kpa jong kane ka samla pule, la sngewthuh ba ka lah ban don eiei sha lyndet kaba khlem pat paw pyrthei haduh mynta, bad lehse da ka jingtohkit kaba bniah bad kaba beit yn sa lah ban sei madan ïa ki jingshisha kumba ka long. Ban ong ba ka briew kan khlad namar ka la dih dawai bih bad sdien phasi, ka long ka bym sngewïahap. Kumno yn dih bih shwa bad hadien kata yn sa sdien ha u tyllai ban phasi ïalade?
Ngi kynmaw ba katto katne snem mynshwa, ka la don kawei ka samla ba la tip kyrteng kum ka Rosy Sangma kaba la khlad ha kawei ka jaka sumar ha Gurugram Haryana. Hadien ba la khlad ka Rosy, uwei u khun-ruit jong ka ba la tip kyrteng kum u Samuel Sangma u la khlad da kaba sdien phasi ha kawei ka ïing basa. Kine ki arngut ki dei na ka jylla Nagaland. Na ka liang ka Sorkar Pdeng ka la aiti sha ka Central Bureau of Investigation (CBI) ban tohkit ïa ka jingkhlad jong ka Rosy. Ka CBI ka la lap ba ki nongsumar ha kata ka jaka ha Gurugram ki la leh torti bad bym salia ha ka por ba ki la sumar ïa ka Rosy bad namarkata, ka la khlad noh. Ka jingtohkit halor kane kam pat dep satia bad lehse kan sa poi ka por ba kito kiba la sumar ïa ka Rosy kin sa ngat ha ka jingshah pynsaja katkum ka aiñ.
Na ka liang ka sorkar Meghalaya ka dei ban shimkhia halor ka jingkhlad noh jong ka samla Walinda. Ym tang ba ka dei ban ïakren bad ki pulit ka Rajasthan ban pynthikna ba ka jingtohkit kan long kaba beit, hynrei ka dei ban thoh sha ka tnat Korbar Ri lane sha ka shlem treikam u Myntri Rangbahduh ka Ri ban aiti sha ka CBI ba kan tohkit halor kaei kaba la jia bad ka samla Walinda. Ka jingtohkit kaba beit ka donkam shikatdei namar ki bahaïing hasem ki don ka hok ban tip ïa ki jingshisha kumba ki long bad kiei kita ki daw kiba la pynlong ïa ka khun jong ki ban khlad na kane ka sla pyrthei. Kane ka samla kaba la khlad ruh, ka dei ban ïoh ïa ka hok katkum ka aiñ. Yn hap ban shimkhia halor ki jingjia kiba kum kine khnang ba kan long ka jinghikai na ka bynta kiwei bad khamtam eh ban pynthikna ba kim dei ban nang ïai jia sa ha kiwei pat ki samla.
Ki samla jong ngi kim banse ban leit shabar jong ka jylla na ka bynta ban pule ha ki kyrdan ba kham shalor lane ban trei ban ktah. Ka jingduna ki shlem ai jinghikai kiba paka lane ki jaka trei jaka ktah kiba lah ban siew ha ka dor kaba biang bad kaba ïahap bad ka kyrdan pule, ka pynlong ïa ki samla ba kin wad lad shabar jylla bad wat shabar jong ka Ri. Ki ju don ki khep ba ki samla na ka thaiñ Shatei Lam Mihngi ki ju ngat ha ka jingshah peit khmat ne ka jingshah ñiew beiñ ne ka jingshah kren laiphew jait namar ki kham pher na kiwei pat ki jaitbynriew. Ka Sorkar India ka la thaw da kawei ka kynhun hapoh ka jingkhmih jong u M.P. Bezbaruah ban peit bniah halor ki jingeh ba la ïakynduh da ki nongshong shnong kane ka thaiñ kiba shong ba sah ha kiwei pat ki jylla. Kane ka kynhun ka la pynmih ruh ïa ki jingai jingmut halor kane ka bynta. Hynrei tang kita ki jingai jingmut kim pat i biang satia. Ki sorkar ha kiwei pat ki jylla ki dei ban leh da kaba tyngeh pyrshah ïa kito kiba donkti ban ban-beiñ/leh-beiñ lane ban ktah kti bad pynshitom ïa ki briew kiba dei na kane ka thaiñ.
Ngi kyrmen ba ka sorkar Meghalaya kan ïarap lem ïa ka longïing longsem jong ka samla Walinda khnang ba kan don ka jingbishar kaba hok. Ban shu sngap jar halor kine ki jingjia kam long satia kaba bha namar kan pynshlur ïa kiwei pat kiba don jingthmu sniew. Bunsien ka jingsngap jar halor ki kam bymman ka pynkha roi ïa ki kam bymman. Ka sorkar ka don ïa ka bor ba kan leh eiei namar tang kane ka longïing longsem marwei kan ym lah ban ïakhun na ka bynta ka hok bad ka jingshisha.
