Shillong, Ïaïong 30:
U kyrtong ka NPP na Sohïong konstitwensi, u Bah Samlin Malngiang, u la kynnoh ba dei ka seng UDP kaba la ai nong ïa kito ki briew kiba pan jingtip halor ka hok ban tip (Right To Information) ïa ka MLA skhim tang ban pynjah burom ha kane ka ilekshon.
Ïa kine ki kyntien u Bah Samlin u la ther tyngeh ïa kito kiba pan da ka Right To Information namar ha kine ki san snem u la dep sam haduh 8600 tylli ki longing. Hynrei, balei pat kita ki 14 tylli ki longïing haba kim ïoh kim wan ban ïa pynbeit, hynrei la shu leit thad ha ki lad pathai khubor ynda la poi ka ilekshon.
Ha kane ka jingïalang paidbah kaba la long ha Rangshken ha ka 29 tarik Ïaïong 2023, ki nongkyrshan ka NPP ki la poi palat hajar ngut ha ka jingïadonlang u Symbud Myntri Rangbah ka jylla, u Bah Prestone Tynsong, ki MDC kum u Bah Sherborlang Mawlong, u Bah Bajop Pyngrope, u Bah Lamphrang Blah bad ki nongkitkam ka NPP Sohïong konstitwensi.
U la ong biang kito kiba mih kyrteng ha ophis u BDO kim shym la leit mih, hynrei haba kim wan la hap ban ai noh sha kiwei kiba treh.
Nalor kata, u la ong ruh ba kito kiba leit thad ïa ka skhim RTI sha ki nongthoh khubor kim dei ba ki leh da ka mynsiem lajong, hynrei ki la don kiba ai pisa namar da kylli ki nongthoh khubor kim nang ban jubab. Ka pyni pynban ka jinglehraiñ.
Nangta shuh shuh u la ther tyngeh ïa ki nongïalam ka UDP kiba la kam ba ki la jop lypa ha saw tylli ki polling station ha area Rangshken. Hynrei mynta kin jop ma ki, ynda la ñiew ka vote yn jop ka NPP.
“Lada ki nongïalam ka UDP ki dei ki khun dap shynrang ka kmie ki dei ban weng noh na ka sorkar MDA ba la ïalam da ka seng NPP hadien kata sa wan kynthoh katba mon ha Sohïong, hynrei ïalade ki sdien dui ldui katba ïa ki paidbah ki khang ban kyrshan ïa ka seng NPP” u la ong.
Ha kajuh ka por u la ong ba ki nongïalam ka UDP ki phong da ka dur bula haba ki wan ha Sohïong, katba ha Secretariat ki shri ki bniat ban ïatreilang bad ka seng NPP. Namar kata, u la kyntu ïa ki paidbah ba kim dei ban sngap ïa ki jingkynthoh ka NPP namar um kwah ban long kiba arsap kum ki nongïalam ka UDP.
