Tura, Ïaïong 30:
Ka Meghalaya ka la lah ban ïalehkai bha bad ban khur syndon ki nam jop ha baroh saw tylli ki kyrdan jong ka lympung 4th Street King’s Autocross Challenge kaba dang shu kut shen ha Dimapur ba la long ha ka 28 bad 29 tarik u Ïaïong.
Ha kane ka lympung ïalehkai ki la don haduh saw tylli ki kyrdan, kata ka rookie, open, SUV, bad na ka bynta ki kynthei ha kaba ïa kine baroh saw tylli ki kyrdan la jop da ki nongñiah kali ka Jylla, kata ar ngut na rilum Garo bad ar ngut pat na rilum Khasi-Jaintia. Kaba kham sngewtynnad ka long ba ha ki katto katne ki kyrdan lei, ïa ka nam lahduh la khur lut da ki nongñiah kali jong ka jylla.
Ka khusnam jong kane ka lympung ka la long T.30 hajar ba nyngkong, T.20 hajar ba wan ba-ar bad T.10 hajar ba wan ba-lai kaba dei ruh na ka bynta ka kyrdan rookie bad SUV katba ha ka ‘open category’ na ka bynta ki shynrang bad kynthei pat ka khusnam ka la long T.50 hajar, T.35 hajar, T.25 hajar, T.15 hajar bad T.10 hajar na ka bynta ba nyngkong haduh ba san.
U Aneesh Sangma na Tura, Garo Hills u la wan ba nyngkong ha ka kyrdan SUV da kaba pyndep ha ka por ba 1.05.65 katba ka Nochie Aranchimiksa M Sangma ka la jop ha ka kyrdan jong ki kynthei ha ka por ba 1.42.25.
Ha ka ‘open category’ u Ronan Bazeley u la jop ha ka por ba 1.06.41 ba u la pyndep bad bud sa da u Mihsalsan Bazeh bad Brandon Bazeley Rymbai ha ka kyrdan ba-ar bad ba-lai.
Ha ka kyrdan rookie pat u Elhannan Jason Syiem u la wan ba nyngkong da kaba pyndep ha ka por ba 1.09.47, bud da u Isynei Hinge bad u Alex Suoho ha ka kyrdan ba-ar bad ba-lai.
Haba kren halor kane ka jingjop, u Aneesh Sangma u la ong ba kane ka jing-ïakhun ka la long shisha kaba eh bha hynrei ka jingrai kut bad trei shitom ka la wanrah ka jingjop. Ha kane ka kyrdan SUV, ïa ka kyrdan kaba ar la ïoh da u Larry Mukhim bad u Ruchir C Marak, khun jong ka MLA barim ka Williamnagar, ka Deborah Marak, u la ïoh kyrdan ba-lai.
