Uman, ïaïong:
Katkum ki khubor la ong ba ka jingther ‘namding bad ka jingsiat jong ki shipai ka Russia ha ka Sngi Thohdieng ka la shim ia ka jingim jong 26 ki nong Ukraine, kynthup ia 5 ngut ki khynnah rit kiba la duh ei noh la ka jingim ha ka jingthombor ba khlem sangeh jong ka Russia.
Katei ka jingthombor ba ratbah jong ka Russia ka long ruh wat ha kito ki thaiñ ba bun paidbah nongshong shnong jong ka Ukraine kynthup ia ka nongbah Uman jong ka phang pdeng ka Ukraine, ha kaba la iohi ia ki briew jong ka kynhun iarap kiba dang bunkam ban leit pyllait im bad ban sei ruh ia ki metïap jong kito kiba la sahkut ha ki ïingmala kiba la twa bad julor ha katei ka miet.
La ong ba katei ka jingther ‘namding dusmon jong ka Russia ha kane ka kynti, ka long ruh hadien jong ki katto katne taiew ba ka Russia ka la sangeh ban ther ‘namding sha ki shlem pynmih bor ding jong ka Ukraine.
Kumta la ong ba ha katei ka janmiet Sngi Thohdieng, ki briew jong ka tnat iarap ha Uman, ki la leit her mar-mar sha kitei ki jaka ba la shah ther bad pynjulor da ka Russia, ha kaba ki bor pyniaid jong katei ka nongbah ki la iathuh ba katei ka jingleh jong ka Russia ha kane ka kynti ka la shim ia ka jingim jong 23 ngut ki briew, kynthup ia ki mynsiem ba dang lui-lui naduh ki khyllung- ki khynnah.
La ong ba uwei u rangbah ruh ha katei ka janmiet, u la leit ban wad ia ki khun- ki kti jong u na kawei ka iing kaba la twa bad julor, namar u la iathuh ruh ba u la duh teng ia ki khun ha ki por ba la leit bad kumta ha kane ka por um lah shuh ban pdiang ia kajuh ka jingeh bad u thrang shisha ban iohi ia la ki jong ki khun la ki dang im ne ki la iap ruh.
La ong ba kitei ki ‘namding jong ka Russia ki la leit her ruh sha kiwei ki nongbah kum ka Dnipro, kaba long ka nongbah kaba la dep ioh mad lypa ia ka jingshah thombor ba jur ha u Kyllalyngkot ha kaba 40 ngut ki briew ki la khlad ha katei ka por.
Ki bor pyniaid ki la iathuh ba katei ka jingleit hap ki ‘namding hapoh jong katei ka nongbah Dnipro pat, 2 ngut ki la khlad kiba kynthup ia kawei ka longkmie 31 snem, ryngkat bad i khun ba dang 2 snem jongka, katba ki dang iohthiah ha katei ka por.
Ha kawei pat ka jingjia, la ong ba ki bor pyniaid ka thaiñ sepngi jong ka Kherson ha ka jan miet Sngi Thohdieng ki la iathuh ba ka jingther ‘namding jong ka Russia hapoh ka shnong Bilozerka jong ka nongbah Kherson, ka la shim ia ka jingim jong kawei ka longkmie 57 snem ka rta, ha kaba 3 ngut pat kiwei ki la mynsaw lang ha katei ka jingjia.
Kumjuh ruh na ka liang u President ka Ukraine, u Volodymyr Zelensky u la pynrem jur halor katei ka jingleh dusmon jong ka Russia bad u la kular ruh ba ka Ukraine kan nym aili bad kan pynphai kylliang ia ka Russia ha ki sngi ban wan.
Katba na ka liang jong ka tnat iada ka Russia, ka la ong ba katei ka jingthmu jong ki shipai kam long ban siat dusmon sha ki jaka paidbah hynrei ki la dep peit thuh bha bad ki thmu ruh ban ther tang ha ki jaka ba shong ki kynhun shipai ka Ukraine. Hynrei katei ka jingsiat jongki, ka la kum leit dei bad hap lang ha kitei ki jaka ba marjan bad kiba shong ki riew paidbah.
