Nongpoh, Ïaïong 30:
Ha kawei ka jingjia takhuh kali, ar ngut ki rangbah ki la khlad noh ha shen hadien ba ka Auto kaba ki shong ka la shah tynrah bad shah ban ha kawei ka trok mar ïa poi ha ka shnong Lumdiengngan jong ka surok Shillong Bypass ha Ri-Bhoi.
Kumba la ïohlum jingtip na ki bor pulit, la ïathuh ba katei ka Auto kaba don ïa u nombor ML 10 B 8424 ka dei kaba dang wan na ki thaiñ Jowai katba katei ka trok pat kaba don ïa u nombor AS01 C 1767 ka dei kaba dang leit sha ki thaiñ Jowai na Byrnihat.
La ïathuh ruh ba katei ka Auto ka dei kaba ïaid bakla (wrong side) ha surok bad katei ka trok kam lah shuh ban kiar. Kumta katei ka trok ka la tynrah bad ban syndon najrong katei ka Auto kat haduh ba ki ar ngut ki briew kiba shong hapoh katei ka Auto ki la khlad noh hajuh.
La ïoh jingtip ruh ba kitei kiba la khlad noh ha katei ka jingjia ki kynthup ïa u Bah Kumarlang Marbaniang na ka shnong Umket bad u Bah Marbudkini Pakynteiñ na ka shnong Wahïajer.
