United Nations, ïaïong:
Ka UN Security Council ha ka Sngi Palei ka la kyntu ia ka Taliban ba kan weng biang noh ia ki kyndon pyrkhing baroh kiba ka la buh bad khang ia ki kynthei jong ka ri Afghanistan. Ha kane ka por, ka UN ka la pynrem jur ruh halor ka jingkhang pyrshah jong ka Taliban ia ki nongtrei kynthei kiba long ki dkhot jong ka UN ban iarap ban pdiang bad sam ia ki lad jingiarap ba la pynpoi da ka UN sha Afghanistan baroh shi katta.
Namar la ong ba ka jingwanrah jong ka Taliban ia ki kyndon ban khang pyrshah ia ki kynthei na ki jingpule bad ki jingtrei jongki, ka long ruh ka jingpynkheiñ pat ia ka hok longbriew man briew jong ki paidbah bad ka long ruh ka jingpynduh jingkyrmen ia ki paidbah nongshong shnong ka Afghanistan khamtam ia ki kynthei naduh ki khyllung- khynnah, ki kynthei samla bad kumjuh ki longkmie, namar ka jingbym ioh lad jongki ban im ka jingim kaba laitluid ba kin ïeng ha la ki jong ki kjat bad ka long ruh ka jinghiar kaba khraw lada ki kynthei kin duh noh wat ia ka lad ban pule- puthi bad ban leit trei leit ktah namar kan wanrah jingeh shibun ia ki khamtam ha kum kane ka juk ba mynta.
Namarkata, ka UN ha kane ka kynti ka la kyntu ia ka Taliban ba kan pynkylla bad weng noh ia kitei ki kyndon jingpyrkhing baroh, kiba ka la buh bad pyntreikam ban khang pyrshah ia ki kynthei ha ki liang baroh namar la ong ruh ba katei ka jingleh jong ka Taliban ka la pynkheiñ bad knieh noh ia ka hok long briew- man briew jong ki kynthei bad ka la knieh noh ia ka hok jinglaitluid jong ki.
Namar kumba long ha kiwei pat ki ri jong ka pyrthei, ki kynthei ruh ki don hok ban ioh ka lad ba kin pule- puthi, ba kin pyntbit ialade bad ba kin trei bad kin ïeng ha la ki jong ki kjat bad ym ju dei ruh ban leh shiliang khmat ia ki kynthei hynrei ki don ka hok ban im bad ban trei ban ktah kumba long ki shynrang.
Namarkata ruh ka UN Security Council ka la kyntu ia baroh ki seng bad ki ri jong ka pyrthei baroh kawei, ba kin ialeh katba lah ban tehlakam noh ia kitei ki kyndon bad ki jingpyrkhing ba ka Taliban ka la pyntreikam naduh ka por ka jingïoh knieh jongka ia ka bor synshar hapoh Afghanistan ha kine ki snem ba la leit.
Shuh shuh ruh ka United Nations ka la pynpaw ia ka jingsngewkhia jong ka jing bym iohlad jongka ban phah ia ki lad jingiarap sha ki paidbah nongshong shnong jong ka Afghanistan kiba don hapdeng ka lanot jong ka jingkyrduh bad ka jingiap thngan.
Kumjuh ruh ka nongrah ktien jong ka United Arab Emirates sha ka UN, ka Lana Zaki Nusseibeh haba iadei bad kane, ka la ong ba ka pyrthei baroh kawei kam lah ban shu shong sngap mynthi katba ki kynthei ha Afghanistan ki dang shah leh donbor, shuwa ba kin jah bad ba kin shah pynduh jait noh syndon.
Namar la ong ba ka Taliban naduh ba sdang jong ka jingwan jongka ha ka bor hapoh Afghanistan ha ki snem ba la leit, ka la sdang shuwa da kaba khang ia ki khynnah kynthei ba kim bit ban leit sha ki jaka pule. Nadien kata, ki la sdang pat ban khang sa ia ki samla kynthei ba kim bit ban leit sha ki jaka pule bad sha ki jaka trei jaka ktah jongki bad ba kim bit shuh ruh ban iadon bynta ha ki jaka paidbah kum ki jaka shangkai lane ki Park bad ha kiwei kiwei de ki jaka kiba pher ba ki khynnah- samla kynthei bad ki longkmie ka ri Afghanistan kim lah shuh ban iadon bynta lang hapoh ka imlang- sahlang.
