Shillong, Ïaïong 30:
Ka Khasi Hills Autonomous District Council (KHADC) ka la kyrpad ïa ka Tripura Tribal Areas Autonomous District Council (TTAADC) ba kan peitngor ba ki Khasi-Pnar kiba shong ba sah ha Tripura kin nym shah iehbeiñ bad shah mushlia ha kaba ïadei bad ki hok jong ki, la ka dei ha ka liang ka riti dustur, ka khyndew ka shyiap bad kiwei pat.
Ka kynhun ka KHADC hapoh ka jingïalam u Bah Titos W Chyne kum u Chief Executive Member (CEM) ryngkat ki Executive Member ba kynthup ïa u Bah Martle Mukhim, Kong Grace Mary Kharpuri, Bah Teiborlang Pathaw, Bah Mitchell Wankhar bad u Bah Rangkynsai Kharbuki lem bad ki ophisar, ka la pynsngew ïa kane ha ka por ba ka kynhun ka don ha Tripura naduh ka 25 tarik mynta u Ïaïong ban ïamir jingmut bad ki nongïalam ka TTAADC kumno ban pynkhlaiñ ïa ki aiñ ban ïada kyrpang ïa ki riewlum.
Ha ka 26 tarik u Ïaïong hapdeng ka jingïalang ïamir jingmut, ka KHADC ka la ïoh jingtip ba ka TTAADC ka la ithuh kyrpang ïa ki Khasi-Pnar kiba don ha kane ka Jylla kum ki riewlum, bad la buh ruh ïa ki dur sah kynmaw ïa ki Khasi-Pnar ha ka shlem Ri-kynti (Museum). Kumta na ka liang ka KHADC ka la shim ïa ka rai ban leit wad ïa ki ha ka sngi kaba bud kum ka jingai jingkyrshan bad ai mynsiem ïa la ki para doh para snam da kaba kyntait noh ïa kiwei pat ki prokram leit jngohkai.
Dei ha ka 27 tarik u Ïaïong ha ryngkat ka jingïatreilang lang bad ki bor pynïaid ka TTAADC bad ki ophisar na ka Onokati District jong katei ka Jylla, ka kynhun ka KHADC ka la mih na Khumulwng bad leit sha ka shnong ba sah ki Khasi-Pnar ha Gollackpur kaba jngai palat 5 kynta da ki kali ban poi sha katei ka shnong.
KHADC ha Gollackpur
Ka la long ka khyllipmat kaba sngewkmen na ka bynta kitei ki longïing ha katei ka shnong ban ïohi ba don ki paradoh parasnam kiba wan jngoh shaduh katei ka jaka kaba ym ju kham jia koit ban don ba wan naduh ba ki kmie tymmen ki kpa tymmen ki poi shong shnong ha ka Hima Tripura hapdeng ki snem 1940-1970 ter ter.
Ki nongshong shnong ha ka jingïalam u Waheh Shnong u Bah Director Pohthmi bad u Bah Minus Marten ryngkat ki longkmie ki la ap bad pdiang burom ïa ki dkhot ka Council da ka jingsngew kmen ha ryngkat ki riam tynrai.
Hatei ka shnong ki don kumba 29 tylli ki longïing kiba dei na ki kur Dkhar, Pohthmi bad kiwei kiba dei tynrai na ki thaiñ War Jaiñtia.
U Bah Titos u la kyntu ïa ki bor ka TTAADC ban shim khia bad phai khmat lem ban weng ïa ki jingeh ki Khasi-Pnar kiba dei kiba la ithuh paka kum ki riewlum ha ka Jylla naduh ka por ki Syiem Manikya. U la kyntu ba dei ban don ka skul ha katei ka bynta ban ai jinghikai ïa ki khynnah bad dei ban don ïa ka sobjek Khasi.
U Bah Titos u la ong ba um poi pyrkhat ban don ki paradoh parasnam kiba shong sha kine ki bynta bad kumta mar ïa ïoh jingtip ki la pynkynriah noh ïa kiwei ki prokram bad wan wad ïa ki kum ka dak ka jingkyrshan bad ai mynsiem bad pynpaw ïa ka jingkmen ba u lap ïa ki ba ki dang kren da ka ktien Pnar bad dang pynneh ïa ka riam ka beit bad ka riti dustur.
Kiba la ai jingkren ha kane ka jingïakynduh ki kynthup ïa ka Kong Grace Mary Kharpuri, u Bah Martle N Mukhim, u Bah Director Pohthmi bad u Bah Minus Marten kumjuh ruh na ka liang ki ophisar ka TTAADC. Ka kynhun ka KHADC ka la noh synñiang ruh da ka pisa sha kane ka shnong kum ka dak ka jingai mynsiem bad jingkyrshan ïa ki.
U Deputy Chief Executive Officer ka TTAADC, u Budhilian Hrangkhawl, u la kular ba ka Council ha Tripura kan ai ka jingkyrshan kaba kyrpang ïa ki Khasi- Pnar ha kane jaka bad kyntu ruh ïa ki ban wan sha khmat ban pynsngew ïa ki jingeh jong ki. U la ong ba ka Council kan wad lad wad lynti ban buh ïa ka skul kumjuh ban pynkhlaiñ ïa ka jingtreikam ki Waheh Shnong na ki shnong Khasi da kaba ai u synñiang pisa bad kiwei ki jingdonkam kiba dei hok ban ïoh kum ki riewlum ka Jylla bad ba ki dei ban wan mih sha khmat ban ïatreilang.
Ki ’riew rangbah bad ki longkmie ki la pynpaw ka jingkmen kaba ym lah ban batai da ki ktien halor katei ka jingwan jngoh ki dkhot na ka KHADC. Ki la ong ba kam ju don ka jingwan peit wan jngoh da mano mano ruh bad ki shah leh klet ha ki bor Sorkar katei ka Jylla. Na kine ki rangbah la ïoh jingtip ba ki don sa kumba ha saw bad san tylli ki shnong ba ki Khasi-Pnar ki shong shnong kum ha Kurma, Dartuicherra, Hilsara bad Jalai bad baroh na ki hi ki im ha ka rep ka riang bad mad jingeh ruh ha ka jingbym ioh ia ka roi ka par wat haduh ka pule puthi.
KHADC ha Balicherra
Hadien kane, ka kynhun ka la hiar sa ha ka shnong Balicherra ha kaba ki don 11 longïing ki Khasi-Pnar kiba shong ba sah ha kane ka shnong. Ha kane ka shnong ki don ki kur Pasleiñ, Swer bad kiwei pat bad kine ruh ki la pynpaw ka jingsngewkmen ban don ki paradoh ki parasnam kiba wan jngoh ïa ki.
Ki longkmie longkpa naduh ki samla ki la ai jingkren ban pdiang sngewbha ïa ka kynhun ka KHADC da ka ktien Pnar. Na ka liang ka KHADC, kiba la ai jingkren ki kynthup ïa u Bah Martle Mukhim bad u Bah Titos W Chyne katba na ka liang ka TTAADC pat la ai jingkren da u Budhilian Hrangkhawl, uba dei u Deputy Chief Executive Office.
U Bah Titos hadien ba u la sngap ïa ka jingkren ki nongshong shnong, u la kyntu jur ïa ka TTAADC ba ym dei ban don kiba mushlia ïa ka khyndew ka shyiap kaba ki Khasi kiba shong ba sah ha kane ka Jylla ki la ïoh pdiang na u Syiem ka Hima Tripura ha ki snem shwa ka jingïoh laitluid ka Ri India bad kyntu ïa ki khun samla ba la nang la stad ha kane ka shnong ban mih khmat ban ïatreilang bad ka TTAADC na ka bynta ki jingmyntoi bad ka KHADC kan don bad ki kum ka nongkyrshan.
U Deputy CEO ka TTAADC, u la kular ban khyllie ïa ki kot ki sla kiba dei bad ki jaka puta jong ki Khasi bad u la ong ba ki Khasi-Pnar ruh ki dei ban wan sha ka TTAADC ban ïakren bad yn pynïoh ïa ka hok jong ki kum ki riewlum ka Jylla naduh ka pule puthi, ka ïoh kam ïoh jam ki samla bad ki jingmyntoi ba ki shnong ki dei ban ïoh.
