Shillong, Ïaïong 30:
U Bah Synshar Lyngdoh kyrtong ka UDP na Sohïong konstitwensi, East Khasi Hills District u la ong kumba ki paidbah nongkyrshan ki ieid bad burom ïa u Bah HDR Lyngdoh uba dei u kñi jong u, kumta ki paidbah ruh kin sngewbha ban ai ka jingieid ïa u khnang ba un long u nongjop ha kane ka ileskhon.
U Bah Synshar u la pynpaw ïa kane haba ai jingkren ha ka jingïalang ïalap ilekshon kaba la long ha shnong Mawlaiteng, Diengiei Area ha ka 29 tarik Ïaïong, 2023. Ha kane ka sngi la sakhi palat hajar ngut ki paidbah ha ka jingïadonlang u President ka UDP, u Bah Metbah Lyngdoh, u Bah Renikton Lyngdoh Tongkhar MLA ka Mawkyrwat, u Bah Maralborn Syiem MLA ka Nongpoh, Bah Ollan Suiñ MLA ka Mawsynram.
U la pynpaw ruh da kaba ong ba u don kata ka mynsiem ban shakri ïa ki paidbah naduh ki por kiba mynshwa lyngba ki dienjat u Bah HDR Lyngdoh uba dei u kñi jong u. Ym tang katta, u la dei ruh u nonghikai jong u kumno ban ai jingshakri ïa ki paidbah. Nangta u la bynrap ruh ba mynshwa u Maheh u la hikai bha ïa ki paidbah nongkyrshan kumno ban pynkhreh ïa ka ilekshon, hynrei mynta ki paidbah ki hikai kylla ïa u. Kumta lada jop ka dei ka jingtrei shitom ki paidbah bad ka jingjop ruh sha u paidbah.
U la bynrap ba u don shisha kata ka mynsiem jingkitkhlieh ïa thaiñ Diengiei bad ïa ka Sohïong konstitwensi baroh kawei bad kumjuh ïa ka ri bad ka jaidbynriew.
Shuh shuh u la ong ba hadien ka jingkhlad noh jong u Maheh, u la ïaid sha baroh ki shnong jong ka Sohïong konstitwensi bad u la ong ba u sngewthuh ba u Maheh u ieid kyrpang ïa ka shnong Diengiei bad ka thaiñ baroh ka wei. Kumta u la ong ba lada u Maheh u ieid ïa ki nong Diengiei, na ka liang jong u un ieid arshah ïa ki. Namar kata, u la pan ka jingkyrshan ban ailad bad ban jied bad pynjop ïa u ïoh lehse un trei kham bha bad un ïasaid ïa ki jingeh ka Sohïong konstitwensi bad ka jaidbynriew ha ïingdorbar thawaiñ.
