Nongpoh, ïaïong 30:
U kpa jong ka samla Walinda Binong kaba la khlad kyndit-kynsan ha Rajasthan, ha ka Sngi U Blei u la pynpaw ba na ka liang ka jong u da leilei um pdiang satia ba ka khun ka jong u, kaba stad, kaba shlur bad kaba shemphang, kan shim noh ïa la ka jong ka jingim.
U Bah Rubi Binong, uba dei u kpa jong ka samla Walinda, u la ong ruh ba um sngewïahap satia bad ka jingkam jong ki bor ba dei khmih ka Mody University ba ka khun jong u, ka la dih dawai bih bad hadien kata, ka la phasi ïalade.
Ka samla Walinda, 19 snem ka rta, ka dei kaba pule ha ka School of Design ha Mody University kaba don ha Lakshmangarh, Sikar ha jylla Rajasthan. Kane ka samla ka la sdang ban pule ha kane ka skulbah naduh u bnai Risaw 2022.
U Bah Rubi u la ïathuh ba dang ha ka 26 tarik ïaïong ha ka por nohphai sngi, kata shisngi hashwa katei ka jingjia, ka khun ka jong u ka dang ïakren bad la ka kmie lyngba ka ‘phone’ ban pyntip ïa kiei ki jingleh ki jong ka hapoh katei ka skulbah. Ka samla Walinda ka la ïathuh ruh ha ka kmie ba kan leit ban ïadon bynta ha ka jingñiah kulai lane kata ka Horse Riding ha ka por janmiet ha katei ka skulbah, la pynkynmaw u kpa.
U Bah Rubi u la leit shaw ïa ka met kaba sah jong ka khun jong u na Rajasthan bad u la wan poi ha ka step jong ka Sngi U Blei sha la ïing kaba don ha ka shnong Nongagang Marngar, Ri-Bhoi.
Haba ïakren bad u nongai khubor mynta ka sngi, u Bah Rubi u la ïathuh ba ha ka 27 tarik ïaïong, u la ïoh jingtip lyngba ka ‘phone’ na ki bor jong katei ka skulbah kiba la bthah ïa u ba u dei ban wan kyrkieh sha katei ka jaka pule naba ka khun jong u ka la shitom jur.
Ha ka jingshisha u la mut ban leit ha katei hi ka sngi, hynrei namar ka jingbym ïoh tiket liengsuiñ shuh, u la hap ban leit noh ha ka step kaba bud kata ha ka 28 tarik ïaïong.
Ha ka janmiet jong ka 28 tarik ïaïong, u Bah Rubi u la ïathuh ba u la poi sha katei ka skulbah da ka jingkyrmen ba un ïohi da la ki khmat ïa la ka khun, hynrei phewse, ïa ka khun ka jong u, ki bor pynïaid katei skulbah ki la dep ban pynkit hi sha ka CHC ha Lakshmangarh khlem ka jingdon lang ki bor pulit lane ki bahaïing hasem.
Nalorkata, u la ïathuh ba ha ka jaka ba kin ïalam ïa u sha katei ka CHC, pynban la phah rung ïa u sha ka Conference Hall jong katei ka skulbah ha kaba ki bor pynïaid ki la pyntip ba ka khun ka jong u ka la dih dawai bih bad phasi ïalade.
Da ka jingbym sngewlah ngeit ïa katei ka jingkam jong ki bor katei ka skulbah, na ka liang ka jong u Bah Rubi lem bad ki bahaïing hasem bad ki paralok, ki la buh jingkylli ïa uwei u nonghikai katei ka skulbah halor katei ka jingjia, hynrei uta u nonghikai u khlem treh satia ban jubab bad phet syndet na katei ka jaka, kaba la pynbitar shla ïa ki.
U Bah Rubi u la ïathuh ruh ba ha ka jingshisha na ka liang ki bor pynïaid katei ka skulbah ki la kwah ban leh ‘Post Mortem’ da uwei u doktor, hynrei na ka liang ka jong u, kum u kpa, u la dawa ba dei ban leh da ka Medical Board kaba don kumba saw ngut ki doktor, bad ïa kane u la pdiang kumba u la dawa.
Hynrei u la pynpaw ba shiteng na kane ka kaiphod jong ka ‘Post Mortem’ um pdiang satia bad ban jur ba ka khun ka jong u kan ym leh satia ïa katei ka kam ban shim kat ïa la ka jong ka jingim na ba kadei ka briew kaba shlur, kaba stad bad kaba ïathuh hok.
Halor kane ka jingjia, u Bah Rubi kum u kpa, u la kyntu jur ïa ki bor jong ka sorkar jylla ba kin shimkhia ban pynlong ïa ka jingtohkit kaba thikna ban lap ïa ki jingshisha baroh bad ruh ba ka sorkar kan shim ïa ki lad ki lynti nangne shakhmat ban pynthikna ba ki hajar ngut ki khun samla ka jylla kiba leit ban wad jingstad bad trei sha ki bynta bapher bapher jong ka Ri kin don ïa ka jingshngaiñ bad lait na kine ki jingjia kumba la wan jia ha ka khun ka jong u.
