London, ïaïong:
U khun jong u nongialam ba ha khlieh-duh mynshuwa jong ka ri Qatar u Sheikh Jassim Bin Hamad Al Thani, mynta ka kynti u la phah ia ka jingtyrwa kaba khatduh da kaba pynbiang ia ki kot ki sla kiba donkam na ka bynta ban ioh thied noh shalade ia ka klob ialehkai phutbol ba pawnam na London ka Manchester United.
Kumta ha kaba iadei bad katei ka bynta jong ka jingtyrwa ka jong u da ka song pisa kaba bun na ka bynta ban thied-duh shalade ia katei ka klob ialehkai ba pawnam ha ka lympung English Premier League, ka jingtyrwa jong u Sheikh Jassim mynta ka kynthup ruh ia ka jingthmu na ka bynta ban pyniaid shakhmat ha ka dor kaba heh tam ha kaba iadei bad ka song pisa jong ka klob bad ruh ka jingpynlut ha ka jingtei ba i donkam ha ka klob baroh kawei.
Ka tyllong khubor ka iathuh ruh ba kata ka jingtyrwa ka jong u ka long na ka bynta 100% ia ka klob bad ruh uba lah kular na ka bynta ban weng noh ia baroh ka ram ka shah kaba ka klob haduh mynta ka dang shah tynrong. Shuh shuh ka khubor ka iathuh ruh ba ka Manchester United bad ka Raine Group kawei na ki shlem kynshew pisa kaba pyniaid ia ki kam ki jam ha kaba iadei bad ki jingtyrwa kiba lah wan sha ka klob, haduh mynta kam shym la ai kano kano ka jubab na bynta ka jingkynthoh ka jong ka bad kam shym la pynpaw kano kano ka jingbatai kaba bniah ha kaba iadei bad ka jingbei pisa ia kaba yn pyllait paidba kyrpang.
Hynrei kiwei pat ki khubor ki iathuh ba ka jingtyrwa jong u Sheikh Jassim ka hap ha ka jingduna da 6 billion pounds ($7.54 billion) na ka dor ba lah buh hakhmat da ki trai jong ka klob ka ‘Glazer Family’; hynrei kiwei pat ki khubor ki iathuh ba katei ka jingtyrwa kaba mynta ka lah ban shongdor haduh kumba 5 billion Pounds.
Kum ban shu pynkynmaw hangne ka long ba kitei ki trai jong ka klob kiba na ka ri USA ha u snem ba lah dep ki la pyllait paidbah halor ka jingkwah jong ki ban die noh ia ka klob bad tang hadien khyndiat sngi ki lah ioh ia shibun ki jingtyrwa kiba lah wan, kaba kynthup naduh u heh saipan jong ka ri Bilat u Jim Ratcliffe bad u nongkhaii ba radbah ka Finnish u Thomas Zilliacus.
Kano kano ka dor na ka bynta ban die noh ia ka klob baroh kawei ka lah ban kiew shaduh ka jingiateh kaba heh haduh mynta kata sha ka $5.2 billion kynthup ia ka ram ka shiah bad ka jingpynlut ia kaba hap ban siew sha ka klob Chelsea.
Ka klob Man United ka long kaba saw napdeng ki klob ialehkai phutbol kaba riewspah tam eh ha ka pyrthei bad mynta ki nongiathong na ka bynta ka klob ki iohi ia ka kum ka atiar kaba hakhmat eh na baroh ha katei ka jait jingialehkai.
Ha u bnai Lber mynta u snem, ki tyllong khubor ki iathuh ba u Sheikh Jassim u lah dep ban phah ruh ia ka jingtyrwa kaba ar ka jong u na ka bynta ban thied shalade ia katei ka klob ha ka dor kaba lah kot sha ka $10.7954 pounds.
