New Delhi, ïaïong:
Kat kum ka khubor ba la ioh lum ka iathuh ba ka kynhun ialehkai Hockey jong ki kynthei ka ri India kan pynkhreh mynta na ka bynta ka jing-leit ia aireng bad ka Australia ha ki san tylli ki jingialehkai ka ban sdang naduh ka 18-27 tarik u Jymmang ha MATE Stadium, Adelaide.
Ha kaba iadei bad katei ka bynta, ka khubor ka iathuh ruh ba katei ka kynhun ialehkai ka ri kan iakhun pyrshah ia ka Australia ha ki lai tylli jing-ialehkai ba nyngkong jong katei ka lympung. Hadien kata yn pynbud pat da ki ar tylli jing-ialehkai pyrshah ia ka Australia A. Shuh shuh ruh ka kynhun ialehkai ka ri kan ialehkai ia ka jing-ialehkai sdang ka jong ka ha katei ka jingleit iakhun shabar ha ka 18 tarik u Jymmang ha shuwa ba kan phai biang sha ka jingia aireng biang ka jong ka sa shisien ha ki jingiakhun ha ka 20 bad 21 tarik. Katei ka kynhun ialehkai ka ri kan pynkhreh ruh na ka bynta ka jingiakhun bad ka Australia A ha ka 25 bad 27 tarik u Jymmang.
Kumba ka paw mynta ka long ba ka kynhun ialehkai na Australia haduh mynta ka dang shong ha ka kyrdan ba 3 ha ka pyrthei katba ka kynhun ialehkai jong ki kynthei ka ri India ka shong mynta ha ka kyrdan ba 8.
Katei ka jingleit iakhun ka India sha Australia kan long ruh kum shibynta jong ka rynsan hikai bad kilan-met ha shuwa ban ioh shimbynta ha ka Asian Games mynta u snem ka ban sa long naduh ka 23 tarik u Nailur haduh ka 8 tarik u Risaw 2023. Shuh shuh ruh ha u K’lyngkot mynta u snem, ka tei ka kynhun ialehkai ka ri ka lah leit ban ia aireng sha South Africa ha kaba ka kynhun ka lah khur ia ka jingjop ha ki saw jingiakhun jong ka bad pyndep ruh ia ka jingleit ia aireng ka jong ka da 5-1, 7-0 bad 4-0 v jingjop ha kaba sdang jong ki lai jingialehkai; katba ka jingiakhun kaba saw ka lah kut noh da ka jingiakhaid kol da 2-2. Ha kata ka jingleit iakhun ka jong ka, katei ka kynhun ka lah mad ruh ia ka jingshah pynrem da 1-3 kol ha ka kynhun ialehkai na Netherlands ha ki lai jingialehkai ba khatduh jong ki.
Ia kaba mynta, kita ki nongialehkai ka ri ki lah pynkhreh bha ialade na ka bynta katei ka jingleit iakhun jong ki sha Australia da kaba shimbynta bha ha ka Senior Women’s National Coaching Camp kaba dang long mynta ha SAI, Bengaluru.
