Nongpoh, Ïaïong 30:
Ka lympung ïalehkai Basketball kaba la ai kyrteng kum ka 3rd Berchem Cup Open To All Basketball Tourna-ment 2023 kaba la pynïaid da ka Seng Samla Nong-poh Proper ha madan basketball jong ka Sajer, ka la poi noh sha kaba kut ha ka sngi Saitjaiñ, ïa kaba la pynhap pyrda da u MLA ka Nongpoh, u Bah Mayralborn Syiem.
Ha kane ka sngi ba la pynhap pyrda ïa kane ka lympung ïalehkai basketball, la wan ban ïadon ryngkat ruh da u Bah Ferynald K. Kharkamni, President ka Khasi Students’ Union, North Khasi Hills District, u Bah Luistar Lyngdoh President ka Federation of Khasi Jaiñtia & Garo People, North Khasi Hills District, u Bah Marcus Marten, President Hyn-ñiewtrep National Youth Front, Northern Region, u samla Lumlang Shylla, President Seng Samla Nongpoh, ki nongïalam shnong ki nongïalam raid, lem bad ki paidbah kiba la wan ban ai jingkyrshan ïa la ki kynhun ïalehkai.
Haba phai sha ka jingïalehkai, ha ka liang ki kynthei, ka jingïakhun final ha kane ka sngi ka long ka Dubakh pyrshah ïa ka SYM. Ha kane ka jingïakhun kaba ïakhaid bad shongshit bha, ka kynhun jong ka Dubakh, ka la lah ban pynliem noh ïa ka kynhun jong ka SYM da 57 la 40 basket bad ïoh syndon ban rah ïa ka nam lahduh jong ka lympung ha ka liang jong ki kynthei.
Ha ka liang ki shynrang pat, ka jingïakhun final ha kane ka sngi ka long hapdeng ka kynhun jong ka SYM pyrshah ïa ka Nongpoh Proper bad ha kane ka jingïakhun ka SYM la ïoh rah ïa ka namjop da kaba pynliem da 80 la 56 basket pyrshah ïa ka Nongpoh Proper.
Kum shi bynta ban pynshlur bad ai mynsiem shuh ïa ki samla ïalehkai, na ka liang ka Seng Samla Nongpoh Proper ka la sam ruh ïa ka khusnam kaba kynthup T.25 hajar ryngkat bad ka Trophy ïa ka kynhun jong ka Dubakh kaba la rah ïa ka nam lahduh ha liang ki kynthei. Katba ka kynhun kaba wan ba ar, kata ka SYM la ïoh rah ïa ka song pisa kaba T.10 hajar lem bad ka Trophy.
Ha ka liang jong ki shynrang pat, ka kynhun jong ka SYM kum ka lahduh, ka la ïoh ban khur ïa ka song pisa kaba T.50 hajar lem bad ka Trophy, katba ka kynhun ba wan ba ar, kata ka Nongpoh Proper, ka la ïoh rah ïa ka song pisa kaba T.20 hajar lem bad ka Trophy. Ha kane ka sngi la sam ruh ïa kiwei kiwei ki khusnam shimet na ka bynta ki rang bad ki thei ïalehkai kiba la lah ban lehkai bha ha kane ka lympung.
