Islamabad, ïaïong:
Ha kane ka por la ong ba namar ka jingkit ram- kit shah jong ka Pakistan ha kine ki snem, ka la pynlong ia ka Pakistan ba kan shah pynrung hapoh ka thup jong ki 15 tylli ki ri jong ka pyrthei kiba don hapdeng ka jingkyrduh bad kiba kit ram- kit shah tat haduh kane ka kynti.
Namarkata, ki tnat ba dei khmih jong ka ioh- ka kot ka Pakistan, ki la ong ba ka Pakistan ka hap ban ialeh kumno ban lait noh na katei ka jingeh- jingkyrduh ba ka mad ha kane ka por da kaba thaw lad- thaw lynti thymmai da kumno ban pynkhie im biang nyngkong eh ia ka ioh ka kot ba ka ri ka la duh nong bad hiar ha ki snem ba la leit.
Kumta la ong ba ka Pakistan ka donkam da kumno- kumno kumba USD 40 Billion Dollars naka bynta une u snem 2023 haduh 2024 bad ka don ruh kumba USD 30 Billion ka ram kaba dang sah, kynthup ia ka sut kaba dang hap ban siew.
Ha kajuh ka por ruh la ong ba ka Pakistan ka lah poi ha ka kyrdan jong kito ki ri kiba duna palat ia ka 45% ka jingmih bad kiba don ruh hapdeng ka jingma kaba khraw namar ka jinghap ban kit ram jongki ban pynbit pynbiang ia ki jingdonkam jong ka ri baroh kawei.
Namarkata la ong ba lada peit thuh ia ka jinglong- jingman ha Pakistan ha kane ka por, la i-kumba ka Pakistan kan hap ban mad ia ka jingduk jingkyrduh kaba jur lada kam don lad shuh ban siew ia kitei ki ram bad lada kam lah shuh ruh ban pynmih bad ban khyllie biang ia baroh kiba ka la duhnong ha ki snem ba la leit.
