Shillong, Ïaïong 30:
Ki paidbah ha Rilum Khasi ki la mad ïa ka jingkyrduh doh masi hadien ba ki nongshoh doh ki la ïakynduh jingeh ban ïoh ïa ki masi kiba ju wan poi sha Meghalaya na kiwei pat ki Jylla lyngba ka Assam.
Haba ïakren bad ki nongshoh doh masi, ki la ïathuh ba bun ki paidbah nongbam doh masi kiba la wan khnang sha dukan die doh ban thied ïa ka doh masi, hynrei ki la leit phai thylli noh namar ym don uwei ruh na ki nongkhaïi kiba ïoh masi ban shoh doh bad ban die ha ïew.
Ki la ong ba ka jingbym don doh masi ka dei namar ka jingbym ïoh masi ha kine ki khyndiat sngi.
Ha Mawlai, kaba dei ka jaka die doh masi kaba heh bad thnem bha ha baroh ki sngi, ka la kynjah jar ha ka Sngi U Blei, namar baroh ki nongdie doh ki khlem die doh masi, hynrei la bun tang kiba die doh sniang bad doh syiar.
“Ka jingbym die doh masi ka dei na ka daw ka jingbym ïoh masi na Assam. Ngin ong shuh kumno namar kane ju jia beit man ka por namar mangi kiba shoh doh ngi mad jingeh beit kumne,” la pynpaw kiba bun ki nongdie doh masi haba kren bynñiaw ïa ka Sorkar kaba khlem shimkhia ban pyntikna ba ka Jylla kam dei ban kyrduh masi ban shoh doh.
Na ka liang kiba bun ki nongbam doh masi ki la pynpaw ba kane ka jingbym ïoh doh masi ka lah ban poi sha u pud ban kyrduh doh masi, bad haba kyrduh doh masi, kiba die ruh kin sa pynkiew ïa ka dor.
Kumta ki la ong ba ka Sorkar Jylla ka dei ban peit ïa kane ka jingeh bad pyntikna ba ki nongshoh doh kin ïoh masi.
“Ngi ju ïohsngew na ka por sha ka por ba ki masi ki ju ïaid ïew bha sha Bangladesh. Kumta ka Sorkar Jylla ka dei ban peit ïa kane, namar bun na ki nongshong shnong ngi bam ïa ka doh masi, bad ki nongshoh doh ki dei ban ïoh masi ban shoh doh,” la pynpaw uwei u rangbah uba lyngngoh ïa ka jingbym die doh masi ha Mawlai.
