New Delhi, ïaïong:
Ha ka kam ialehkai shabar-ri kaba nyngkong jong ka nong-ialehkai rah-nar ba pawkhmat ka ri ka Mirabai Chanu ha une u snem ba mynta, ka khubor ka iathuh ba katei ka nongkhur takma na ka Tokyo 2020 kan pynkhreh na ka bynta ban ialam na khmat ia ki hynriew ngut ki nongialehkai jong kawei ka kynhun ialehkai ka ri sha ka Asian Weightlifting Championships 2023 ka ban sa long ha Jinju, South Korea naduh ka 3-13 tarik u Jymmang.
Nalor kata, ka khubor ka iathuh ba katkum ka jingmih (result) ha ka jinglumlang ia ki dor-thong ba ki nongialehkai ki kamai na ka jingialehkai Snatch + Clean & Jerk), ki nong-ialehkai ki ban shimbynta ha kitei ki rynsan iakhun kin lah ruh ha ka ban kyntiew shuh shuh halade ia ka Olympic Qualification Ranking (OQR). Hadien ka jingpyntreikam ia ka jingjied nongialehkai na ka bynta ka Paris Olympic ha ka 28 tarik u Iaiong 2024, na ka liang jong ka International Weightlifting Federation (IWF) kan sa pyllait paidbah ruh ia ka thup kyrteng jong ki nongialehkai kiba bit na ka bynta ban ia aireng sha katei ka lympung ban long ha Paris.
Ha ka lympung ialehkai ba dang shu long shen, ka Mirabai Chanu ka lah wan ba-ar ha ka kyrdan iakob rahnar ki kynthei ha ka 49kg jong ka World Weightlifting Championships 2022 ha Colombia ha u bnai Nohprah. Ka long ruh ka nongialehkai kaba lah khur ia ka takma Ksiar ha ka Commonwealth Games, World Championship, bad ka nongkhur takma Rupa ha ka Olympic, hynrei ka jingpyndep jong ka ha ka Continental ka long da ka takma Rnong ha ka 2020 Asian Championships ha Tashkent.
Na ka bynta katei ka lympung ialehkai ka ban sa long, u Jeremy Lalrinnunga (men’s 67 kg) bad Achinta Sheuli (men’s 73 kg) kin long ki nongialehkai ka ri ki ban ia aireng biang sa shisien hadien ba ki lah koit na ka jingmynsaw ka jong ki. Kumjuh ruh ka Bindyarani Devi kaba lah khur ia ka takma Rupa na ka 55kg ki kynthei ha ka 2022 Commonwealth Games, kan nang iai bteng ha ka ban ia aireng ha katei kajuh kyrdan ialehkai ha ka lympung.
Ki kynhun rah-nar ka ri ki ban shimbynta ha ka Asian Weightlifting Championships mynta u snem ki long:
Women: Mirabai Chanu (49kg), Bindyarani Devi (55kg)
Men: Shubham Todkar (61kg), Jeremy Lalrinnunga (67kg), Achinta Sheuli (73kg), Narayana Ajith (73kg).
