Shillong, Jymmang 01:
Haba ther ïa ka jingkren u Symbud Myntri Rangbah, u Bah Prestone Tynsong uba dei ruh u nongïalam ka National People’s Party (NPP), ka Khun Hynñiewtrep National Awakening Movement (KHNAM) ka la ong ba lada peit ïa ka jingkren jong u Bah Prestone, kan long kaba dei eh lada weng noh ïa ka MLA skhim, ha kaba baroh ki kam pynroi ki dei ban ïaid lyngba ka shlem treikam ki Block Development Officer (BDO) bad ki bor pynïaid district, namar lada ka long kumne, yn pyntikna ba ka rukom pyntrei kan biang bad yn lah ban pyndep ha ka por bad biang ki jingkheiñ jingdiah.
Ka KHNAM ka la ong ruh ba kane kan pyntikna ruh ba ki nongkhaïi kim dei ban shah khring sha ka saiñ hima na ka bynta ki kam khaïi shimet jong ki.
Kane ka jingther ka KHNAM ka dei kum ka jingbym ïahap ïa ka jingkren u Bah Prestone ha ka jingïalap ilekshon ha Sohïong haba ïadei bad ka skhim MLA.
Ha u kyrwoh sha ki lad pathai khubor, u Vice President ka KHNAM u Bah Thomas Passah u la ong ba ka jingkren lyngba ka rynsan ïalap ilekshon ha Sohïong kaba u Bah Prestone u la ong ba ïa ka MLA skhim la pynmang tang ïa ki nongthep vote kiba kyrshan ïa u kyrtong ha ka por ilekshon, ka pynskhem ba ka T.12.5 klur kaba ïoh uwei uwei u MLA ha ki 5 snem, ka dei tang ka jingaiei kaba pyndonkam da ki nongsaiñ pyrthei ban myntoi saiñ pyrthei kaba long pyrshah ïa ki kyndon jong ka Election Commission ka ri India.
U Bah Thomas u la ong ba ka jingthmu jong ka MLA skhim ka long ban thaw ki lad ban buh ïa ki jingtei jingshna kiba long ka jingmyntoi ïa ki paidbah bad ban weng ïa ka jingduna ki kam pynroi ha ki dong ki thaiñ ym ban kyntiew ïa ka jingmyntoi saiñ hima kumba la ju leh ha kane ka Jylla.
“La ju ïohi ba bun na ki MLA ki pyntrei ïa ki skhim kiba la mang na ka pisa paidbah lyngba ki committee kiba la thaw hi da ki MLA ha kaba la ailad ïa ki MLA ban pynïaid ïa ka bamsap lyngba kine ki skhim. Lada ngi kren shaphang ka MLA skhim ha ki jaka ha sor, ngi la ïohi ïa ka rukom pyntreikam kaba ka jingjop ka long kaba duna bha, namar kajuh ka kam la trei shi trei biang bad ka jingbymbiang ka rukom pyntrei ïa ki kam pynroi ka dei ka jingpynsyrwa ïa ka pisa paidbah,” la ong u Bah Thomas.
U la ong ba la ïohi ruh ba ki MLA ki pyllang ïa ka MLA skhim 5 snem bad ïa kata ka pisa la sam syndon shi snem shwa ka ilekshon kaba pyni shai ba ki shu pyndonkam ïa ka skhim ban myntoi saiñ pyrthei.
