Shillong, Jymmang 01:
Ka sha kaba dih u Myntri Sorkar, u Bah A.L Hek bad ki ar ngut ki MLA ka All India Trinamool Congress (AITC), kaba thew kham shajngai ha ka saiñ pyrthei, lehse ka dei kaba blad, ha kaba ki nongïalam ka BJP ha Meghalaya bad ki nongïalam ha Delhi kim don jingtip ei ei haba ïadei bad ka jingthmu ban ïalong kawei ki MLA ka AITC bad ka BJP.
U Bah Hek, dang shen u la kam ba u la ïoh ban ïakren bad ki ar ngut ki MLA ka AITC ha Meghalaya, kita, u Bah Charles Pyngrope bad u Dr Mukul Sangma ban rung noh sha ka BJP lyngba ka jingdih sha jong u bad ki.
U Bah Hek u la kam ruh ba kitei ki 2 ngut ki MLA ka AITC ki la ong ba kim sngew ei ei lada ïasoh noh bad ka BJP, tangba kin hap ban peit thuh shwa.
Haba ki nongthoh khubor ki buh jingkylli ha ka Lah Sngi U Blei ïa u President ka BJP u Bah Ernest Mawrie, halor ka jingkam u Bah Hek ba u dihsha bad kitei ki ar ngut ki MLA ka AITC bad ïakren ba kin long kawei noh bad ka BJP, u Bah Mawrie u la ong ba ka seng hi baroh kawei kam ïoh jingtip ei ei shaphang kata, hynrei la ïohi ba u Bah Hek u ïathuh lyngba ki lad pathai khubor ba u leit dih sha bad ki MLA ka TMC.
Haba kylli la ka don ei ei ka jingbthah ne ai jingtip na ki heh nongïalam ka BJP na Delhi haduh mynta ban tan ïa ki MLA ka TMC sha ka BJP, u Bah Mawrie u la ong ba haduh mynta, ym pat don ei ei ka jingpyntip ne jingbthah na ki nongïalam bahalor ka BJP na Delhi.
Ha kine ki khyndiat sngi, u MLA ka BJP na South Shillong, u Bah Sanbor Shullai ruh u la ong ba ka jingkam u Bah Hek ba u leit dihsha bad ki MLA ka TMC ba kin rung sha ka BJP ka dei kaba ym don jingtip hapoh ka seng, bad lehse ka dei ka kam shimet jong u marwei.
U Bah Sanbor u la ong ruh ba kiba bun ki MLA na kiwei ki seng saiñ pyrthei ka Jylla ruh ki ju wan dih sha bad u ha kamra treikam jong u ha Secretariat, bad kam mut ba tang shu shong dih sha bad ki MLA, kin rung noh sha ka BJP.
Nangta u la ong shuh shuh ba lada ka BJP ka don shisha ïa ka sienjam kaba kum kata, khlem pep ka jingtip kan don hapoh ka seng bad wat ki nongïalam ka BJP na Delhi ruh kin nang pyntip bad bthah ïa ki nongïalam ka BJP ha Meghalaya ban nang pynbit pynbiang ïa ki jingpynkhreh ban ïoh pynrung ïa ki MLA na kiwei ki seng sha ka BJP, la ka dei ban ïalam ïa ki MLA sha Delhi lane ki nongïalam ka BJP na Delhi kin wan hi sha Shillong.
Kane ka jingïapher ka rukom kren ki nongïalam ka BJP ha Meghalaya ka la pynmih ruh ka jingkylli, hato ka sha kaba dih u Bah Hek kumba u la kam, ka dei kaba blad ban pynpoi ïa ki MLA ka TMC sha BJP?
