Madrid, Jymmang:
Katkum ki khubor la iathuh ba 4 ngut ki la khlad noh hadien ka jing-iatyngkhuh jong ar tylli ki liengsuiñ rit ha ka thaiñ Shatei Lam Mihngi jong ka Spain ha ka Sngi U Blei.
La ong ba ki tnat pynlip ding ki la lap ia kawei ka liengsuiñ na ka khlaw hajan Moia kaba don sha ka phang Shatei jong ka Barcelona hadien ba katei ka kynhun ka la leit mareh bran bran tang ia ioh jingtip halor ka jinghap jong kitei ki liengsuiñ ha katei ka jaka.
Hadien ba la lap ban pynlip noh ia ka ding, katei ka kynhun ka la ioh sei pat ia 2 tylli ki metïap napoh jong katei ka liengsuiñ rit.
Hadien kumba katto katne kynta pat, la shem sa ia kawei pat ka liengsuiñ ha ryngkat 2 tylli hi ki metïap kumba 300 metre ne kumba 984 phut ka jingjngai na ka jaka ba don katei ka liengsuiñ ba la lap nyngkong.
Kumta, ki bor pyniaid jong ka Spain ki ngeit ruh ba kitei ki liengsuiñ ki la iatyngkhuh para ma ki halor suiñ bad leit hap pat la ka jong ka jaka.
Haba iadei bad kane, ki pulit bad ki tnat ba dei khmih, ki la bthah ban tohkit bad wad bniah halor katei ka jingjia bad ka daw jong ka jingiatyngkhuh jong kitei ki liengsuiñ ha katei ka sngi.
