Shillong, Jymmang 01:
Ka Bharatiya Janata Party (BJP) Meghalaya haba kyrshan ïa ka rai jong ka ïingbishar Meghalaya High Court, ha ka Lah Sngi U Blei ka la dawa na ka Sorkar Jylla ba kan shim rai halor ka ‘sngi ot kyrteng’ (cut-off- date”) na ka bynta ka jingpyntreikam ïa ka Roster System jong ka rukom thung kam thung jam hapoh ka Reservation Policy ka Jylla.
Haba kren sha ki lad pathai khubor, u Bah HM Shangpliang uba dei u Convener ka BJP Committee halor ka Roster System u la ong, “Ngi kyrshan ïa ka hukum jong ka ïingbishar High Court halor ka cut-off-date, hynrei ngim ong ban pyntreikam naduh ki snem ba la leit noh ne nangne shakhmat; hynrei ngi kwah ba ka Sorkar kan shim ïa ka rai bad lada ka Sorkar kam lah, ka dei ban long da ka ïingdorbar thawaiñ.”
U Bah Shangpliang u la kdew ïa ka hukum ba la pynmih da ka ïingbishar Meghalaya High Court kaba 3 tarik Ïaïong kaba ong “Ka ïingbishar ka shem ïa ka jingdonkam ban rah sha ka jingïakren halor ka roster hapoh ka ïingdorbar thawaiñ ka Jylla”.
Ka ïingbishar ka la ong ruh ba kine ki dei ka kpait saiñ kam (policy) kaba bha ban ieh ha ka ïingdorbar thawaiñ bad ki bor synshar ha ka Sorkar bad hadien ba kila shim ïa ka nongrim, kan sa long kaba plie lad ïa ki nongshong shnong ba shah ktah ba kin buh jingkylli halor ka jingtreikam katkum ki kyndon ka aiñ.
Haba kylli, une u MLA barim ka Mawsynram u la ong ba ai ba ka Sorkar ha ka kyrdan jong ka bad ka Kynhun Myntri kan shim rai halor kane ka kam.
U la ïeng skhem ruh ba ka BJP kam don eiei ban ong halor ka jingdawa ban bishar thymmai ïa ka State Reservation Policy bad ong “Ngim kwah ktah ïa ka kam ba ïadei bad ka Policy. Ngi kwah ban kren tang halor ka hukum ka ïingbishar ba ïadei bad ka Roster”.
U Bah Shangpliang u la pyntip ba ka committee halor ka Roster System ka la dep shong jingïalang haduh arsien bad ha kaba u la pyntip ba ka kynhun ki nongïasaid aiñ ba la khlieh da u SP Mahanta, ka la ai jingïarap ïa ka committee da kaba ai jingmut halor ki aiñ.
“Ka committee ka la shim ïa ki katto katne ki jingai jingmut ïa kiba ngin sa rah ynda u Myntri Rangbah ka Jylla u khot ïa ngi sha ka All Party Meeting,” la ong u Bah Shangpliang bad bynrap “Ïa ki jingtip ba bniah halor kane ngim kwah satia ban ïathuh hangne namar ngi kwah ban buh na ka bynta ka jingïatai ha ka miej ynda la ïakynduh bad baroh ki seng saiñ pyrthei”.
