Nongstoiñ, Jymmang 01:
Ka jingïai ban jong ki jingpang ki jingshitom da ki snem ki snem ha ki longïing longsem ka dei shisha kawei na ki jingeh bad jingjynjar ba kito ki longïing ki mad.
Ka ïing jong ka Kong Sikna Marngar na ka shnong Nongdiwah West Khasi Hills ka dei kawei na ki longïing kiba la ïakynduh ïa ka jingeh namar ka jingban jong ka jingpang ha kaba mynta la 19 snem naduh ba dang kha u khun shynrang jong ka, u la shu thiah hapoh jingthiah khlem lah ban khie.
Katkum ka jingïathuh jong katei ka longkmie, la ong ba naduh ka por ba dang kha, utei u khun u long kumjuh kumba long kiwei ki khun ba shait ba khlaiñ, hynrei katba nang heh nang san ka jingpang kaba kham pher ka la sdang ban paw khamtam naduh ba u khunlung u sdang ban par. La ong ruh ba la pyrshang ban wad ki lad jingïarap bad khamtam ki jingsumar na kylleng sawdong, hynrei kim shym ïarap eiei.
Nalor kata, ka la ong ruh kaba sngewlyngngoh ka long ba nalor u khun jong ka mynta, sa u ksiew jong ka uba dang 4 snem ka rta ruh u don ïa kane kajuh ka jingpang kumba long u khun jong ka.
Halor kane ka jingmad jingeh jong katei ka longïing, ha ki khyndiat sngi ka Hynñiewtrep National Youth Movement (HNYF) da ka jingsngewkhia ka la ïoh ban leit jngoh ïa katei ka longïing hapoh ka shnong Nongdiwah. Na ka liang jong u President ka HNYM, West Khasi Hills District, u samla Tailanstar Lyngkhoi, u la pynpaw ïa ka jingsngewdiaw bad sngewkhia kaba jur ban ïohi da la ki jong ki khmat ïa ka jingshem jingeh jong kane ka longïing.
Namar kata, ka HNYM ka kyrpad jur ïa ka sorkar khamtam ïa ka tnat Social Welfare, ki nongmihkhmat ka thaiñ ba kin phai khmat bad peit kyrpang ïa kane ka longïing kaba mad ïa kane ka jingeh.
