Cairo, Jymmang:
U Mairaj Ahmad Khan bad ka Ganemat Sekhon ki long ki nongsiat Suloi ka ri kiba la khur mynta ia ka takma Ksiar na ka rynsan iakhun Skeet Mixed Team. Da kane ka jingjop ki la pynioh sha ka ri baroh kawei ia ka takma ba nyngkong eh na ka lympung ialehkai kaba mynta jong ka ISSF Shotgun World Cup ha Cairo.
Ha ka jing-iakhun ka jong ki, ka khubor ka iathuh ba kitei ki shijur ki la lah ban pynliem noh ia ki shijur iakhun pyrshah na Mexico u Luis Raul Gallardo Oliveros & ka Gabriela Rodriguez da 6-0 ha ka jngiakhun phainal ka jong ki. Ha katei ka lympung ialehkai, ka ri Italy ka lah khur noh shalade ia ka takma Rnong lyngba ki shijur kiba lah mihkhmat ia ka ri kata ka Simona Scocchetti bad Gabrielle Rossetti. Ka khubor ka iathuh ruh ba u Mairaj u la lah ban ialehkai bha ha ka kylla jied kynhun ialehkai jong k 30 kynhun, ha kaba u lah siat 74/75 na ka bynta ban iarap ia ka kynhun ialehkai baroh kawei ka jong u ban khur baroh-lin ia ki 143 dor-thong na ka 150 bad kata ka lah iarap ruh ia ki ban khur ia ka takma Ksiar ha ka jingiaknieh kyrdan ba nyngkong hadien ba ki lah rah ia ka jingjop ha ka shoot-off ha jingiakhun bad ki nongialehkai na Mexico da 4-3 hadien ba ki lah poi sha ka jingiakhaid.
Ha ka decider, u Mairaj sa shisien u lah nang iai pyntyllun ia ka rukom ialehkai bha ka jong u da kaba siat bha ha ki saw sien siat ia kaba lah iaraplang da ka Ganemat, ha kaba ki shijur iakhun pyrshah ki lah lait ban siat ia lai tylli ki sim na ka bynta ban ai sha katei ka kynhun ialehkai ka ri ia ka jingtam jingjop shakhmat da 2-0.
Sa shisien u Mairaj u lah bteng biang ia ka jinglah siat pyndei ka jong u ia saw tylli ki sam ha ka jingiakhun kaba ar watla ka Ganemat ka lah lait ban siat ia ki ar tylli bad ha kaba sa shisien ki shijur iakhun pyrshah ki lah lait ban sait ia ki lai tylli ki sim bad pynlong ia ka kynhun ialehkai ka ri ban tam jingjop biang sa shisien da 4-0.
Ka jingiakhun kaba khatduh ka long kaba kham plie ka lad ka lynti ia ki nongialehkai ha ka por ba u Mairaj u lah lait ban siat ia ar tylli ki sim bad ka Ganemat ia kawei, hynrei ki shijur na Mexico ki lah lait ban siat ia baroh saw tylli ki sim bad ba lah pynlong ia ka kynhun ialehkai ka ri ban khur syndon ia ka takma Ksiar.
Ka khubor ka iathuh ruh ba katei ka lympung ialehkai ka long ruh kaba san na ka bynta u Mairaj ban khur takma ISSF na ka lympung ialehkai jong kiba lah san bad kumjuh ruh kaba saw na ka bynta ka Ganemat kaba kynthup ia ka takma Ksiar kaba ar ha ka rynsan ialehkai ba mar shijur.
